DILI, STLTIMORLESTE.com – Parlamentu Nasional (PN) liu husi Prezidente Komisaun A neebe trata asuntu Konstituisionais no Justisa, Deputadu Natalino preokupa ho dezempenhu servisu husi asesor internasinal sira neebe governu fo salariu boot maibe halo servisu lentu liu.
“Hau hakarak bolu atensaun ba Vise Ministru Asuntu Parlamentares too dala rua ka dala tolu ona, liu-liu asesor sira, lei barak Konselhu Ministru aprova tiha ona kuaze semana tolu too agora seidauk aprezenta mai Parlamentu Nasional,” dehan Deputadu Natalino dos Santo liu husi plenaria PN, Segunda (02/02/2026).
Deputadu hatutan, nia foti kestaun nee tanba iha debate orsamentu jeral estadu, ohin debate hotu, halo kedas redasaun final no haruka kedas ba Prezidente Republika, nusa iha Parlamentu Nasional bele iha governu labele fali.
Tan nee nia husu governu presiza asesor internasional sira nia servisu, tanba asesor internasional oras nee kria hela grupu hodi koalia sira nia interese, no sira uza Timor Leste hanesan objetu ba sira nia interese.
“Lei barak aprova tiha ona, halo deit redasaun final labele lori mai no hau identifika hanesan mos konselhu ida haree ba iha neeba ida hanesan amiasa ida ke iha grupu interese, entre sira iha grupu interese, pelo termu deskulpa iha kor mutin no metan, sira trava malu presiza haree, sira mai iha nee atu presta, ita presiza atu apoia maibe la bele uza timor hanesan objetu ida ba sira,” dehan nia.
“Ita haree katak asesor sira neebe mai balun veteranus tiha ona, sira hatene tiha ona ita frakeza sira tenta atu trava para dependensia nafatin ba sira. Vise Ministru favor ida atu aprezenta nee iha reuniaun Konselhu Ministru para atu haree,” Adianta nia.
Nia fo ezemplu, ministeriu ida neebe prepara proposta lei ba sibernetika, se asesor sira seidauk prepara, Parlamentu Nasional liu husi Komisaun A hakarak avansa ho anti projetu, tanba kestaun ida nee importante teb-tebes.
Nia mos husu ba Xefe Gabinete sira iha kada ministeriu atu orienta asesor sria halo servisu tuir prioridade governu nian, hodi halo servisu para hatene rezultadu nee iha neebe.
“Se sira mai fo asesoria ba administrativa deit, Timoroan bele halo servisu sira nee, mais sira mai atu kompleta ita atu haree kona-ba lei presiza lao maibe tanba sa mak lei sira nee la mai,“ fundamenta.
(alb)
