BAUKAU, STLTIMORLESTE.com – Tuir planu loron 06 Fevereiru 2026, Primeiru Ministru (PM) Kay Rala Xanana Gusmão mak ofisialmente sei lansa fatuk dahuluk ba projetu reabilitasaun estrada urbana Baukau Vila iha Munisipiu Baukau.
Prezidente Autoridade Munisipiu Baukau, Veneranda Lemos hateten, Autoridade Munisipal simu ona informasaun direita husi Ministru Obras Publikas Autoridade Munisipal hahu halo ona preparasaun ba seremonia lansamentu fatuk dahuluk projetu reabilitasaun estrada urbana Baukau Vila neebe hahu kedas iha loron 01 Fevereiru 2026 too ohin loron, neebe seremonia lansamentu refere sei realiza iha area Vila Antiga ho kultural tuir identidade kultura Baukau nian.
“Ami rona informasaun direitamente husi Ministru Obras Publikas katak, Sr. Primeiru Ministru rasik mak sei tun,” hateten Veneranda Lemos ba jornalista sira iha Vila Nova Baukau, Tersa (03/02/2026).
Eis deputada nee katak, implementasaun projetu estrada urbana nuudar dever Governu nian atu responde, tanba nee bainhira finaliza sei responde nesesidade bazika komunidade nian iha Munisipiu Baukau.
Aliende mos nia konsidera, infraestrutura sira hanesan estrada urbana Baukau Vila bainhira finaliza sei kompleta mos infraestrutura bazika ba implementasaun poder lokal.
“Sim klaru, ida estrada urbana nee um dos critérios ba dezentralizasaun poder lokal,” Veneranda katak.
Entretantu projetu reabilitasaun estrada urbana hamutuk kilometru 23 neebe sei responsabiliza husi kompanhia JOVA tuir planu sei lansa fatuk dahuluk iha loron 06 Fevereiru 2026 tuku 10:00 dader.
(tom)
