DILI, STLTIMORLESTE.com – Kondisaun estrada husi Diresaun Gleno too Atsabe, sempre halo komunidade sira neebe halo viajen ho transporte husi Dili bá Atsabe no Atsabe mai Dili sempre halerik no senti triste tanba dalan tatidik, dalan neebe nakonu ho tahu dodok no halo transporte kois bá mai.
Tuir observasaun STL iha terenu, Tersa (03/02/2026), kondisaun dalan husi Gleno atu bá Atsabe kuaze ladiak hotu, tanba dalan kuak-kuak, dodok nakonu ho tahu kois hodi halo kareta ho bis tatidik no kois bá mai, nunee mos ho motor. Ho situasaun nee halo komunidade sira neebe sae iha bis ka iha kareta laran nee sente tauk, halerik no fuan nakadoko.
Tuir Komunidade Martinu Gomes hatete, kondisaun estrada iha tempu udan hanesan nee ho kareta kiik mai too Atsabe, senti fuan taridu tanba rai dodok no kois. Ho bis deit mos senti fuan taridu tiha ona satan ho kareta kiik ka motor.
“Dalan atu mai Atsabe no atu fila fali bá Dili nee, ita tenke terus iha kareta laran durante viajen. Dalan laos deit tatidik, mais dalan nakonu ho tahu dodok depois halo kois, nomos dalan aas sira balun tohik dadauk. Bainhira too iha dalan sira nee, halo Ita senti triste, tauk no fuan la hakmatek. Ita senti viazem nee nakonu ho tauk mak makas liu,” dehan nia.
Nia katak, ho kondisaun dalan bá Atsabe nian neebe grave nee, husu bá governu atu bele haruka kompania sira suru tiha tahu dodok sira iha estrada laran, atu nunee labele fo impaktu bá komunidade no transporte sira neebe halo movimentu bá mai.
Nunee mos Fidelia da Cruz dehan, bainhira movimentu ho transporte bá Atsabe no fila fali bá Dili iha tempu udan, laran nee sempre senti triste no tauk, tanba deit dalan neebe aat. Fuan senti nakdoko bainhira bis tama iha dalan neebe nakonu ho tahu hodi halo karte kois atu monu la monu, atu halis la halis. Nunee mos bainhira dalan atu sae no tun, tanba tauk kareta atu kois no monu. Situasaun neemak halo komunidade kiik sira nee senti tauk no triste ho kondisaun dalan nee bainhira iha tempu udan.
“Hanesan povu no Atsabe oan senti laran triste ho kondisaun estrada nee. Atsabe mai Dili nee ita haree besik hela, Oras 3 ka 4 nee too ona. Maibe tanba deit dalan neemak halo viazem lori kedas oras 6 mak foin too. Tanba dalan nakonu ho tahu halo rai kois, entaun kareta sira tenke halai neneik,” nia tenik.
Nia hatutan, espera ho planu governu nian neebe atu hadia dadauk dalan husi Letefoho bá too Atsabe bele realiza lalais. Atu nunee povu kiik sira bele senti kontenti, hodi lori sira nia produtu lokal mai faan iha merkadu.
(dom)
