BAUKAU, STLTIMORLESTE.com – Prezidente Konselhu Munisipal Kombatentes Libertasaun Nasional (KMKLN) Baukau, Cornelio Gama “L7” espresa sentimentu kontente hein lansamentu fatuk dahuluk ba projetu reabilitasaun estrada urbana Baukau Vila.
Lansamentu projetu estrada urbana Baukau Vila, tuir planu loron 06 Fevereiru 2026, Primeiru Ministru (PM) Kay Rala Xanana Gusmão mak ofisialmente sei lansa fatuk dahuluk.
“Ami veteranu Munisipiu Baukau agrasede ba Primeiru Ministru, tanba koalia kona-ba dezenvolvimentu, primeiru dezenvolvimentu mak haree estrada sira nee lansamentu primeira pedra ami veteranu kontente,” hateten L7 ba jornalista sira iha Vila Antiga Baukau, Kuarta (04/02/2026).
Kondisaun estrada urbana Baukau Vila diresaun husi Vila Antiga too Vila Nova no kontinua too iha area Nagardjo Uainiki difikulta movimentasaun transporte publiku no privadu, tanba kondisaun aat, maibe Governu liu husi Ministeriu Obras Publikas halo esforsu atu reabilita estrada refere.
L7 katak, hanesan veteranu sente kontente no agradese ba Primeiru Ministru Kay Rala Xanana Gusmão, tanba iha vizaun koalia kona-ba dezenvolvimentu infraestrutura bazika sira liu-liu estrada urbana Baukau Vila neebe bele responde ba komunidade sira nia halerik durante nee.
“Kuandu mosu ona halerik sira nee lakon derepente deit ona, kuandu seidauk mosu nee mak dehan estrada la diak kareta halai la diak, mais kuandu mosu ona nee kontente, estrada nee remata kareta la katik ona lao normal ona,” L7 komenta.
Prezidente KMKLN Baukau nee konsidera, lansamentu fatuk dahuluk ba projetu reabilitasaun estrada urbana Baukau Vila laos koalia deit, maibe iha duni asaun, tanba nee povu Baukau tenke kontente.
Aleinde mos nia katak, projetu reabilitasaun estrada urbana Baukau Vila bainhira finaliza kompleta ona infraestrutura sira hodi lori Munisipiu Baukau ba Munisipiu dahuluk implementa poder lokal.
Entretantu projetu reabilitasaun estrada urbana hamutuk kilometru 23 neebe sei responsabiliza husi kompanhia JOVA tuir planu sei lansa fatuk dahuluk iha loron 06 Fevereiru 2026.
(tom)
