DILI, STLTIMORLESTE.com – Komisaun F neebe trata asuntu Saude Seguransa Sosial no Igualidade Jeneru iha Parlamentu Nasional (PN) husu Governu liu husi Ministeriu Saude (MS) atu kuidadu ho surtu Nipah neebe oras nee alarga ona ba nasaun barak.
Prezidente Komisaun F, Deputada Maria Bareto hatete, nia parte asesu ona informasaun husi media katak, oras nee virus Nipah hahu ataka ona nasaun barak.
Tuir nia, oras nee Timor Leste hasoru hela problema konaba moras dengue, tanba nee nia husu Governu liu-liu Ministeriu Saude atu koordena ho ministeriu relevante sira atu trava surtu Nipah labele tama Timor Leste.
“Ita mos presiza antisipa nunee moras nee labele tama tan mai ita nia rai laran, tan nee Komisaun F sei halo audiensia ho ministra iha semana oin hodi rona took sira nia preparasaun atu prevene surtu foun nee,” hatete Prezidenti Komisaun F, Deputada Maria Bareto ba jornalista sira iha resintu Parlamentu Nasional, Kuarta (04/02/2026)
Nia hatutan, iha semana oin komisaun F sei halo karta ida ba Ministeriu Saude hodi halo audiensia, nunee husu tuir preparasaun Ministeriu Saude atu prevene surtu nee.
“Iha tempu badak ami sei konvida Ministeriu Saude liu-liu ba senhora Ministra no Vise Ministru nain rua atu halo audiensia, husu preparasaun Ministeriu Saude atu atu haree ba surtu foun neebe oras nee hahu invadade nasaun balun,” tenik nia.
(alb)
