DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ikus, deside absolve arguidu ho inisial CC husi krime Roubo.
Iha sala julgamentu laran Juiz prosesu Jumiati Freitas deklara katak, faktus neebe konsta iha akuzasaun la provadu ida, katak momentu neeba lao arguidu mak halo aktu refere.
Tribunal deklara, antes julgamentu hahu lezadu ba iha prosesu nee notifika maibe la hatene sira nia paradeiru. Tribunal mos bazeia ba arguidu nia deklarasaun katak, laos arguidu mak halo aktu nee.
Tanba nee Tribunal konsidera arguidu nia aktu la prienxe ba krime neebe Ministeriu Publiku akuza mai iha Tribunal, ho nunee Tribunal deside absolve arguidu husi krime refere.
Antes nee, iha alegasaun Prokurador Bartolomeo de Araujo deklara katak, arguidu nega ba faktus neebe iha, tanba vitima hateten katak, ema neebe foti sasan isin boot no alturas.
Prokurador deklara, sasin sira la haree kona-ba saida mak akontese, maibe arguidu nia deklarasaun iha PSIK katak, arguidu mak halo duni asaun nee. Tanba nee MP konklui katak, arguidu mak halo aktu ida nee, husu Tribunal atu kondena arguidu pena prizaun tinan tolu suspende tinan tolu.
Enkuantu husi parte defeza nian, Zermano Barros deklara katak, arguidu laos ema neebe halo asaun nee no lezadu neebe hanesan vitima la sai hanesan sasin atu mai reforsa faktus neebe iha. Tanba nee defeza husu Tribunal atu absolve arguidu husi kazu nee.
Iha indisus sufisiente katak, iha loron 17/09/2022 lezadu AS ho lezada JP ba pasear iha dolok oan Kristu Rei nia kotuk hodi selebra lezada nia aniversariu.
Too iha fatin neeba, lezadu sira tur hodi konversa sobre sira nainn rua ninia relasaun domin kuaze oras 4 nia laran.
Hotu tiha lezadu hamriik dudu motor atu sira nain rua fila ba uma, maibe derepente deit arguidu kaer katana ida too ba husu sira nain rua katak, imi halo saida iha nee? Maibe sira hatan dehan ami la halo buat ruma”.
Maibe arguidu kontinua husu ba sira katak, imi hatene ka lae iha fatin nee iha ona tara bandu, maibe lezadu hatan katak tara bandu nee ba ema hotu ka ba ami nain rua deit.
Nunee, arguidu hateten ba sira atu lalika husu tan, too ameasa no haruka sira atu fo osan US$ 500, serveja kaixa 1 no karau 1, maibe lezadu sira hatan katak sira estudantes be laiha osan.
Tanba nee mak arguidu se katana ba lezadu hodi ameasa no husu sira entrega sira nia telefone. Tanba tauk lezadu nain rua mos entrega duni sira nia telefone (Samsung A71, kor mutin ho folin US$ 400 no iphone 6) ba arguidu.
Tuir fali arguidu hasai tiha xavi motor nian husi lezadu nia liman no husu fali ba sira katak hakarak fila ka lae, tanba nee mak lezadu mos ho tauk dehan o hakarak saida deit ami bele fo, importante ami nain rua bele fila ba uma.
Tanba nee mak arguidu mos entrega fila fali xavi motor nian ba sira no hameno ba sira katak, bainhira fila fali ba iha fatin neeba karik tenke lori osan hodi fo ba nia (arguidu), maibe lalika lori ema barak. No para iha estrada ninin fo sinal apita hodi nunee arguidu hatene.
Bainhira arguidu fo fali xavi motor nian, sira nain rua mos fila kedas, maibe ba hatoo kedas keixa iha eskudra polisia, depois mak sira ho polisia ba fali kedas iha fatin refere hodi hein no buka arguidu, maibe la hetan.
Mezmu nune la kleur deit polisia iha Postu Hera nian lori arguidu ba entrega iha polisia neebe akompanha lezadu sira.
Iha altura neeba arguidu hatais kamiza no kalsa kor metan hotu, taka ulun metin ho hena too kakorok no taka oin ho maskara kor metan.
Iha loron 17/10/2022, iha PCIC nia oin, halo rekonhesimentu ba arguidu, nune lezadu sira konfirma katak, arguidu mak ida nee duni.
Konsekuensia direita no nesesariamente husi arguidu ninia hahalok nee halo lezadu nain rua tauk hodi entrega sira ninia telemovel A71 ida no iphone 6 ida ba arguidu nudar garantia ba vida foin arguidu fo fali xavi motor nian hodi nunee, lezadu nain rua mos bele sai husi fatin neeba.
Arguidu hakarak ho intensaun, kaer katana ida ba ameasa no halo tauk lezadu sira, husu osan, karau no tua (serveja) maibe tanba lezadu sira laiha, nunee nia ameasa hodi foti telefone rua husi lezadu sira nia pose.
Ho nunee, arguidu nuudar autor material ho forma konsumadu, hodi pratika krime Roubu neebe previstu no punidu tuir artigu 253 husi Kodigu Penal.
Audensia julgamentu nee prezide husi Juiz Koletivu, Jumiati Freitas, Jose Gonsalves, Juiz estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Jermano.
(ter)
