DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain tolu (3) ho inisial IG, AdS no VES, tanba naok lezadu inisial MBC nia asu.
Iha indisus sufisiente katak, arguidu sira halo kombina atu naok ema nia asu, nunee iha loron 02 fulan Fevereiru 2019, por volta de 00h30m (meia-noite), arguidu IG konduz motorizada tau tali iha kotuk liu husi lezadu MBC nia uma oin, haree lezadu nia asu toba iha uma oin.
Depois arguidu para tiha motor no lori tali metan neebe sira prepara ona tau iha asu nia kakorok no ikus mai arguidu konduz motorizada halai makaas, nunee tali aperta asu nia kakorok hodi sira lori ba besik ema tuu billyard, area tore TVTL nian.
Depois lezadu rona asu nia ain kukun rasta ba rai tarutu, tanba nee lezadu lori motor buka kuandu hetan arguidu AdS lori fatuk riba ba asu nia ulun, rezulta asu mate, nunee lezadu husu indemnizasaun sivil ba ninia asu atu arguidu sira selu ho folin US$ 50.
Katak arguidu sira ho forma livre, deliberada no konsiente komete faktu neebe deskreve iha leten, no arguidu sira hatene katak apropria ema seluk nia sasan ka animal nee proibidu no hetan punisaun tuir lei penal, maibe nia kontinua pratika aksaun nee.
Tanba nee, Ministeriu Publiku akuza arguidu komete krime Furtu Simples, previstu iha artigu 251 no artigu 252 husi Kodigu Penal Timor Leste nian.
Hatan ba faktus nee, arguidu IG hili direitu nonok.
Tanba nee Tribunal haree katak, lei fo dalan atu arguidu bele hili nonok, tanba nee arguidu nia direitu.
Tribunal haree katak, iha prosesu nee arguidu nain tolu maibe arguidu nain rua la marka prezensa, no arguidu nain ida mak marka prejensa, no hili direitu nonok la koalia ba faktus.
Ho ida nee, Tribunal Koletivu deside adia prosesu nee ba iha loron seluk hodi rona deklarasaun husi lezadu nian.
Audensia julgamentu nee prezide husi Juiz Koletivu, Jumiati Freitas, Jose Gonsalves, Jose Quintao, Ministeriu Publiku reprezenta husi Prokuradora Lidea Soares, arguidu hetan asistensia legal husi Defensor Publiku Anzelmo Akara.
(ter)
