DILI, STLTIMORLESTE.com – Governu Estadus Unidus Amerika (EUA) liu husi sira nia Embaixada iha Dii, Timor Leste, sei oferese treinamentu kontra terorizmu neebe sei fo husi US Marine Corps ba Membru Unidade Espesial Polisia (UEP) nain 35.
Formasaun nee hanesan parte ida atu hasae Interopabilolidade entre PNTL-UEP ho US Marine Corps, hodi fasilita konhesimentu tekniku pratiku neebe diak no fortalese kooperasaun bilateral iha area seguransa ba apoiu estabilodade nasional no rejional.
“Ita hetan oportunidade husi parseiru Embaixada Estadus Unidus Amerika (EUA) hodi konvida eis Mariñas Korpu nian atu fo formasaun iha Embaixada, entaun aproveita oportunidade sira mos mai halo formasaun liu-liu ba Unidade Espesial Polisia, ita foti sira neebe mak foka liu ba komandu operasaun espesial,” hatete Komandante Jeral Polisia Nasional Timor-Leste (PNTL), Komisáriu Jeral Henrique da Costa ba jornalista sira iha Komandu UEP Bairo Pite, Dili, Kuarta (04/02/2026).
Komisáriu Jerál PNTL dehan, formasaun ida nee sei halao durante loron tolu, liu-liu atu aprende kona-ba kontra terorizmu nian husi maluk sira neebe iha espesialidade ba area nee.
“Entaun sira fo oportunidade ba ita nia polísia hodi bele tuir treinu. Treinu ida nee bele fo mós ita nia oportunidade ba unidade espesiál sira hodi responde ba terorizmu karik,” nia esplika.
Nia informa katak, agora daudaun ameasa terorista nee laos dehan iha nasaun ida ka rua deit, maibe bele hatete katak iha nasaun barak terorista nee sai hanesan ameasa ida.
“Ita mos tenke prepara ita nia kapasidade para nunee ita bele responde karik hanesan ameasa sira nee mosu mai iha ita, ita nia membru sira nee hetan ona selesaun husi unidade espesial hodi tuir duni formasaun ida nee,” katak nia.
35 pesoas mak partisipa iha formasaun ida nee, iha Komando Operasaun Espesial nia membru balun hetan ona formasaun iha rai laran inklui balu iha rai liur.
Nia tenik, sira nee balun hetan formasaun iha rai laran, balun hetan formasaun iha Australia, Portugal balun mos ba iha Indonezia, agora sira hetan oportunidade husi kolega sira Estadus Unidus Amerika hodi fo formasaun refere laos foin primeira vez, maibe hahu kedas husi tinan 2018 fo ba unidade espesiál ho nivel tres no sira seluk mos.
“Ida ohin nee ba iha numeru ida neebe husi naval mos, ita bele hatete katak formasaun ida nee, ita nia membru sira sei aproveita didiak hodi sai hanesan futuru ema sira nee ita bele utiliza, agora sira hetan ona formasaun mas ba oin komando mos haree oinsa para nunee haree mos ekipamentu ruma sira bele uza, ita bele hetan formasaun barak mas se karik laiha apoiu husi ekipamentus sira, ita labele halo buat ida,” nia koalia.
Kona-ba kondisaun hira nee, Komando PNTL sei aprezenta ba Eselensia Ministru Interior hodi bele tau atensaun ba iha unidade eapesial polísia, partikularmente ba iha Polísia Unidade Espesiál.
Iha fatin hanesan, Chason Peabody nuudar Regional Security Officer hatete onra boot ida hodi asiste parseria inkrivel ida nee nuudar ofisial aplikasaun lei federal nian.
“Nuudar veteranu ida husi Mariña Estadus Unidus nian, hau sente hanesan iha uma entre ofisial polísia sira, soldadu sira, Mariñeiru sira no Mariña sira, Kursu ida nee, reprezenta liu husi instrusaun teknika iha Marte. Kompromisu ba profisionalizmu, ba seguransa no komunidade no ba hametin seguransa no soberania ekipa Orle nian,” nia deklara.
Iha loron tolu tuir mak sei fo treinamentu ho peritu sira neebe sei hetan orientasaun husi instrutor korpu mariña EUA nian.
“Sei aprende abilidade sira neebe presiza atu halao operasaun sira kontra-terorizmu nian ho seguru, abilidade sira laos deit tatiku sira, estratejiku iha operasaun hotu-hotu, ita-boot halao kontribuisaun sira ba estadu direitu, tuir nee atividade ilegal no promove estabilidade Rejional,” nia informa.
Nuudar parseiru, Estadus Unidus orgullu atu hamriik hamutuk ho Ekipa ida nee hodi harii konfiansa ida neebe iha kapasidade iha forsa polísia auto-sufisiente, neebe junta abilidade espesializadu sira no mantein komunidade sira seguru.
Nia hatutan, kontra terorizmu mak servisu ida neebe difisil liu no ho risku aas liu iha aplikasaun lei no iha militar. Ida nee presiza disiplina, abilidade julgamentu no konfiansa, ida nee mos presiza aten-barani moral atu halo buat neebe loos iha presaun nia okos.
“Ba ami nia instrutor Mariña, Korpu, obrigado tanba atu fahe ita-boot nia esperiensia, tempu no kompromisu ba exelensia no ba partisipante sira neebe prepara an durante loron tolu,” nia dehan .
“Sira sei asume responsabilidade atu lori ba oin, lisaun sira, sei aprende iha misaun hotu-hotu, neebe halao ba, Hau hein atu haree oinsa ita-boot sira nia abilidade kontribui ba ekipa ida neebe seguru liu, forte liu ka menus liu no oinsa ita nia profisional sira, no sei kontinua harii konfiansa ida ba sira nee, ita iha dever atu proteje,” nia hakotu.
(jen)
