NITIBE, STLTIMORLESTE.com – Defisiensia mental ida ho naran Angelina Sila iha Bairru Oeltam, Suku Lelaufe, Postu Administrativu Nitibe, neebe moras mental kuaze tinan 7 ona, sulan aan deit iha uma kiik ida, tanba nee Xefe Suku Lelaufe, Jose Neno Sila, koordena ho Assesor Asuntu Sosial, Prezidente Autoridade Rejiaun Administrativa Espesial Oecusse Ambeno (RAEOA) iha semana kotuk, komesa hetan ona tratamentu saude husi Doutor espesialista sira ba moras mental nian, nunee Autoridade apoiu material hodi konstrui uma diak ida ba inan defisiente mental nee.
Tuir Xefe Suku Lelaufe, Jose Neno Sila ba STL iha Bairru Oeltam katak, inan defisiente mental nee moras mental kuaze tinan 7 ona, ho nia oan nain 3, oan nain rua maka kontinua hela hamutuk ho ninia inan no oan ikun nee, hela iha ninia kaben nia knua iha Suku Usi Takeno, Postu Administrativu Oesilo neebe deskonfia abandona husi ninia kaben rasik neebe serbisu hanesan membru Polisia Militar FALINTIL Forsa Defeza Timor Leste (F-FDTL).
“Ohin komandannte F-FDTL Komponente Terestres ho membrus sira mai observa no lori mos apoiu ruma ba inan defisiente mental nee no sira nia prezensa atu justifika loloos katak nia moras mental ka lae, neebe ohin mos sira la konsege tama vizita inan defisiente mental nee, tanba loron kalan sempre temi hela deit nia kaben, hakarak fila ba Dili nomos atu ba fali nia hela fatin iha Aldeia Sanane, Bairru masin, neebe sira ohin mai husu tuir familia sira kona ba inan defisiensia nee,” dehan nia.
Relasiona ona ho moras mental nee, Assesor asuntu Sosial Prezidente Autoridade RAEOA, Agustinho Caet konfesa katak, inan feto moras mental nee nia simu informasaun husi Autoridade Lokal ka Xefe Suku Lelaufe, Jose Neno Sila, tanba nee foin lalais nee nia ho doutor moras mental mai tulun inan feto defisiensia nee.
“Hau simu informasaun inan defisiensia mental nee, husi Xefe Suku Lelaufe, tanba nee maka hau koordena ho doutor sira neebe trata maluk sira neebe moras mental, mai too kedan nia fatin no konsege hetan tratamentu saude, tanba nee maka nia rezultadu, komesa sai ona iha liur tuur hamutuk ho familia no la iha reasaun no komesa koalia diak ona, espera sei diak tanba parte saude kontinua fo tratamentu saude ba nia,” dehan nia.
Nia haktuir tan katak, iha inisiu mai haree kondisaun inan defisiente nee grave teb-tebes, maibe hahu diak uitoan ona, tanba nee Prezidente Autoridade RAEOA, liu husi assesor asuntu sosial hahu halo ona intervensaun liu husi apoiu material konstrusaun hanesan sumenti, kaleng, fatuk no rai henek hodi konstrui uma ida nia atu hela ho dignu nuudar sidadaun Timor oan ida.
“Ami mos sei trata ninia dokumentus sira atu nunee bele hetan direitu pensaun sosial invalidus hodi nunee utiliza ba ninia nesesidade tanba nia iha oan nain rua maka hela hamutuk ho nia iha nee, sira nain rua eskola hela iha EBF Lelaufe, maske sira nia inan moras mental, maibe la satan sira nia bontade hodi hetan nafatin edukasaun,” dehan nia.
Tuir defisiensia mental, Angelina Sila neebe konversa halimar jornalista STL iha ninia hela fatin katak, uluk nia serbisu hanesan Funsionariu Publiku iha Ministeriu Administrasaun (MAE), maibe tinan 7 ona la serbisu tanba moras ataka nia.
“Hau uluk serbisu iha Oecusse, neebe lidera husi Jorge da Conceicao Teme neebe hanesan Sekretariu Estadu Rejional Administrasaun Oecusse (SERAO) depois kontinua serbisu fali iha MAE Dili, maibe moras nee ataka hau, entaun too ohin loron hau la bele halo ona serbisu,” dehan nia.
Nia haktuir tan katak, nia iha kaben ho naran inisial J neebe assume knaar Polisia Militar F-FDTL, maibe ohin loron nia hela fali ona ho nia maun tanba moras ataka nia.
(jos)
