AINARO, STLTIMORLESTE.com — Komunidade Munisipiu Ainaro deskontenti ho obra reabilitasaun estrada Ainaro Vila neebe lao daudaun, deskontenti nee mosu tanba obra reabilitasaun nee lao atrazadu.
Ministeriu Obras Publika (MOP) no Prezidente Autoridade Munisipiu Ainaro iha fim de Janeiru liuba lansa ona obra reabilitasaun estrada Ainaro Vila, hodi autoriza empreza neebe asina kontratu hahu ezekuta obra, maibe implementasaun obra nee la tuir espetasaun povu nian.
Komunidade Munisipiu Ainaro kleur ona mak hein dezenvolvimentu, desde tempu okupasaun too ukun aan, hein hela bainhira governu tau atensaun ba dezenvolvimentu iha Munisipiu Ainaro.
Munisipiu Ainaro iha nia istoria uniku ho nia ema sira neebe mesak matenek no vizionariu, maibe iha dezenvolvimentu tantu iha okupasaun Indonezia nomos ukun rasik aan Munisipiu Ainaro iha kotuk liu.
Se atu lembra fali ba kotuk iha tempu okupasaun, Munisipiu Ainaro ho nia ema sira neebe sai determinasaun ba Integrasaun, hodi lori povu nasaun ida nee atravesa prosesu ida naruk no kleur durante tinan 24 nia laran, maibe Munisipiu Ainaro, laiha mudansa, infraestrutura hanesan estrada akontese deit iha Ainaro Vila, postu sira hanesan hela iha tempu kolonial portugues, suku, aldeia sira izoladu, tanba laiha dezenvolvimentu.
Iha tempu rezistensia Ainaro iha nia ema sira neebe sai admiravel, inimigu reseu ba sira nia prinsipiu no sira aten barani hodi fo vida tomak luta ba ukun rasik an, nunee mos iha tempu ukun aan iha mos Ainaro oan lubun ida okupa fatin importante sira iha instituisaun estadu ka governu, maibe laiha influensia ba dezenvolvimentu infraestrutura iha Munisipiu Ainaro.
Estrada neebe halo iha tempu okupasaun Indonezia agora hela deit mak fatuk nakrekat hanesan iha mota laran. Hodi difikulta movimentu komunidade sira nian tantu ba ema sira lao ain, no ba sira neebe kondus motor no karreta, atravesa iha estrada hirak nee hanesan lao iha mota laran.
Primeiru Ministru (PM) Kay Rala Xanana Gusmão liuhusi nia vizita ba Munisipiu Ainaro iha tinan kotuk liuba, promete ona atu reabilita estrada Ainaro Vila liu-liu estrada neebe liga ba merkadu no edifisiu munisipal nian, nunee mos Ministru Obras Publiku, Samuel Marçal promete atu realiza obra reabilitasaun estrada nee iha tinan 2025. Maibe tanba prosesu, obra reabilitasaun nee foin bele akontese iha fin fulan Janeiru 2026.
“Obra nee lao ona, sobu daudaun husi BNCTL Maulore nian sae ba administrasaun munisipial no merkadu nian, maibe ami hare atrazadu los, empreza Star King seidauk foku ba obra reabilitasaun estrada Ainaro vila,” dehan Jaimeto da Costa ba STL iha Aiteka Laran, Suku Ainaro, Sabadu (31/1/2026).
Jaimeto dehan obra ho kilometru 23 nee loloos fo ba empreza internasional sira neebe iha rekursu naton hodi ezekuta obra nee ho seriedade, kuandu lansa ona, empreza tenke mobiliza nia ekipamentu pezadu sira foku ba reabilitasaun, nunee bele finaliza obra tuir kontratu, maibe obra fo ba empreza neebe nia ekipamentu la sufisiente no sei iha impakta ba obra nee rasik, pior liu atrazadu no abandonadu.
Nia dehan, obra reabilitasaun nee lansa semana ida ona, maibe rezultadu seidauk barak, foin kee sai fatuk sira nakrakat iha estrada laran, no seidauk atiru fali rai henek hodi fasilita movimentu transporte publiku no privadu.
“Estrada kee deit, depois la atiru fali ho raihenek, nee bele difikulta ema nia movimentu kuandu udan hamosu tahu, estrada kee ona tenke tuir kedas kerikil, nunee udan karik tahu la sae,” suspira Jaimeto.
Enkuantu Marcos de Araujo agredese tebes ba governu neebe komesa halo ona reabilitasaun ba estrada Ainaro Vila neebe kleur ona mak povu hein, tanba atravesa estrada ho kondisaun hanesan agora, nee susar tebes.
“Durante nee ami terus los ba estrada nee, ami hein hela se governu bele tau atensaun, faktus mak komesa reabilita ona, lao sei neineik, maibe se beibeik sei finaliza duni tuir kontratu,” dehan Marcos.
Nia dehan dezenvolvimentu nee prosesu ida lori tempu, laos halo ohin, aban hetan kedas rezultadu, maibe fiar katak la kleur tan povu sei goza estrada diak, atu iha tinan nee ka tinan oin 2027 povu Ainaro sei hetan estrada.
“Estrada kilometru 23 nee kobre hotu Ainaro Vila tomak bele mos too area Nugfu nian, tanba Ainaro sidade ida klot,” tenik Marcos.
(god)
