BAUKAU, STLTIMORLESTE.com – Aleinde projetu reabilitasaun estrada urbana Baukau Vila, Governu liu husi Ministeriu Obras Publikas (MOP) mos fo tan projetu reabilitasaun estrada rural hamutuk pakote 8 ba Munisipiu Baukau.
Diretor Servisu Munisipal Obras Publikas Baukau, Agostinho Ximenes informa, projetu reabilitasaun estrada urbana Baukau Vila Governu sei lansa fatuk dahuluk iha loron 06 Fevereiru 2026, maibe iha tinan nee mos Governu liu husi Ministeriu Obras Publikas aprova ona projetu reabilitasaun estrada rural balu ba Munisipiu Baukau atu implementa iha tinan nee.
“Kona-ba estrada rural tinan ida nee ita hetan pakote 8 nia kilometru hamutuk 20.7,” Agostinho informa ba jornalista sira iha nia knaar fatin Uatelete, Kinta (05/02/2026).
Nia esplika, projetu pakote 8 refere, pakote dahuluk kilometru 3 implementa iha Postu Baukau Vila, Suku Seisal neebe nia diresaun husi estrada boot too area Agé. Pakote daruak no datoluk kilometru 5 implementa iha Postu Kelikai diresaun husi Lawaliu too Suku Makalaku.
Pakote dahaat too daneen kilometru 7.25 implementa iha Postu Kelikai diresaun husi Lakuliu-Lakudala too Uaibitai, pakote dahitu kilometru 2.6 implementa iha Postu Matebian diresaun husi Laisorulai ba Suku Maluru no pakote daualu kilometru 2.8 implementa iha Postu Laga diresaun husi Atelari ba Borudua.
“Nia valor orsamentu ita seidauk hatene tanba ita nia kompanhia manan nain ita seidauk hatene, tanba sei hein dezisaun husi faze avaliasaun iha aprovizionamentu,” Agostinho informa.
Diretor nee katak, projetu reabilitasaun estrada rural hamutuk pakote 8 bainhira implementasaun sei tuir modelu estrada rural nian reabilita ho cor sementi, maibe iha diferente tipu, tanba pakote 6 reabilita ho tipu plan kontrit no pakote 2 reabilita ho tipu fiver kontrit.
Nia sublina, prosesu ba implementasaun projetu estrada rural hamutuk pakote 8 refere daudaun parte aprovizionamentu halo hela avaliasaun no bainhira remata sei implementa nunee bele fasilita movimentasaun komunidade sira nian ho transporte publiku no privadu.
“Ita agrasede ba Ministeriu katak, estrada hirak nee kuandu finaliza ita nia komunidade neebe iha produtu lokal no kondisaun emerjensia sira bele ajuda ona sira, tanba antes nee sira halerik ba estrada,” Agostinho espresa.
Diretor nee argumentu, mezmu tinan nee Ministeriu Obras Publikas aprova deit estrada rural ba Munisipiu Baukau ho pakote neebe kiik, maibe konsidera bele ajuda ona, tanba kada tinan Ministeriu refere sempre aprova projetu reabilitasaun estrada rural ba Munisipiu Baukau, maske oituan, maibe beibeik. Tanba nee husi estrada rural sira neebe eziste iha Munisipiu Baukau mezmu too ohin loron seidauk reabilita too 100%, maibe atinji ona 80%.
(tom)
