DILI, STLTIMORLESTE.com – Prezidente Republika (PR) Jose Ramos Horta hasoru malu ho eis Prezidente Republika Indonezia (RI) Megawati Soekarnoputri iha Abu Dhabi, Emiradu Arabe Unidu (EAU) hodi hametin relasaun estratejika Timor Leste ho Republika Indonezia.
Iha vizita nivel aas ba Emiradu Arabe Unidu ba enkontru Fraternidade Humana, Prezidente Republika Jose Ramos Horta halao enkontru ho eis Prezidente Indonezia, Megawati Soekarnoputri, iha Abu Dhabi hodi hatudu ligasaun istorika no pesoal neebe klean entre nasaun rua nee.
Iha hasoru malu nee, Prezidente Ramos Horta hatoo konvite ofisial ba Megawati atu vizita Timor Leste, karik iha fulan Agostu oin mai.
Prezidente enfatiza katak nuudar líder Partidu Politiku boot iha Indonezia (PDI-P) nian, Megawati sai parseiru fundamental ida hodi mantein rekonsiliasaun no fraternidade neebe define ona relasaun entre nasaun rua nee dezde restaurasaun independensia.
Iha sira nia diskusaun, Xefe Estadu fahe informasaun optimista kona-ba progresu Timor Leste nian, hodi foti nasaun nia estabilidade interna no laiha violensia polítika, etnika, ka relijioza.
Líder rua nee mos revee interdependensia ekonomika entre estadu vizinhu sira, hodi nota katak kuaze 60% husi importasaun Timor Leste nian mai husi Indonezia no rihun ba rihun estudante Timoroan kontinua estuda iha universidade sira iha Indonezia.
Prezidente Ramos-Horta sublina katak dame no kooperasaun ekonomika neebe iha agora sai hanesan sasin global ba susesu husi prosesu rekonsiliasaun bilateral neebe inisia husi Xefe Estadu rasik, Megawati, no Xanana Gusmão.
Aleinde kestaun bilateral, líder rua nee mos troka hanoin kona-ba dezafiu global sira, liuliu diskute kona-ba impaktu negativu husi tarifa komersiu internasional no krizie umanitaria iha Gaza, Sudaun, no Afganistaun.
Prezidente Ramos Horta halo komparasaun entre konflitu global sira nee ho modelu Timor Leste, hodi dehan katak Timor Leste hetan bensaun tanba kbiit atu rezolve problema istorika sira liu husi dialogu.
(eme)
