BAUKAU, STLTIMORLESTE.com – Primeiru Ministru (PM), Kay Rala Xanana Gusmão ho Ministru Obras Publikas Samuel Marcal inklui membru Governu balu, halo serimonia asinatura kontratu ba estrada Urbana Baukau, Munisipiu Baukau.
“Agradese ba Governu ida nee liu husi Prezidente Autoridade Munisipiu Baukau durante nee halo esforsu, ohin konsege realiza duni lansamentu ba estrada urbana,” dehan Xefe Suku Builai, Juvinal F. da Costa ba STL iha Baukau, Sesta (06/02/2026).
Nia esplika, hanesan lideransa komunitariu sente orgulhu tanba bele hadia ona estrada sira nee atu Baucau sai sidade ida neebe furak iha ema hotu nia matan, tanba Baukau nee troka malu dala hira ona, maibe iha uniku feto ida ho nia esforsu tomak bele realiza dezenvolvimentu estrada ida nee.
Nia dehan, durante nee komunidade sira preokupa duni kona-ba estrada neebe iha, maibe esforsu neebe iha ikus mai realiza duni. Hanesan lideransa komunitaria husu ba iha komunidade sira hotu atu hatudu komprensaun servisu hamutuk hodi bele apoiu ba servisu neebe iha.
Aleinde nee Komunidade Ana Maria Da Silva dehan, sente kontente ho planu Governu nian.
“Ami kontente atu asesu ba estrada, maibe esensial liu mak hadia estrada sira iha aldeia, tanba komunidade sira neebe hela iha aldeia barak mak lori sira nia produtu mai fan iha merkadu,” dehan nia.
Nia hatutan, produtu lokal neebe faan iha sidade Baukau laran nee produtu barak mak mai husi area remotas, tanba nee importante duni hadia estrada.
Nia dehan, iha aldeia sira nee estrada iha maibe ida tempu uluk nian, too agora kondisaun ladun diak hotu ona, presiza duni hadia. Tanba nee agradese ba planu governu nian, maibe sira nafatin presiza eletrisidade no mos bee moos.
Tuir observasaun STL nian, akompanha iha serimonia nee membru Governu balu inklui estudante no komunidade sira iha Baukau laran.
(ter)
