DILI, STLTIMORLESTE.com – Bolsa Kandidatu profesores nain 20 neebe hanorin estudantes husi nivel ensinu baziku iha Munisípiu Bobonaro, muda fali ba sira nian munisípiu laiha konhesimentu husi Ministeriu Edukasaun (ME) liu husi Edukasaun Munisípiu Bobonaro.
Kestaun nee hatoo husi Diretor Servisu Edukasaun Munisipiu Bobonaro, Miguel Freitas ba jornalista STL iha Bobonaro liu husi telefone, Sesta nee (06/02/2026).
“Ita nian bolsa kandidatu profesores nee mos ami halo identifikasaun nafatin, maibe seidauk hotu, tanba balun muda ba fatin seluk laiha konhesementu husi Edukasaun Munisípal, la hatene sira liu husi meus ida neebe mak fila fali ba sira nian fatin nee, nee mak ami atu buka tuir sira nee mak kusta oituan, ita bele dehan bolas kandidatu profesores nian 20 nunee mak muda ba sira nian fatin no laiha konhesimentu husi ami,” katak nia.
Miguel dehan, bolsa kandidatu nain 20 nee laos muda ba eskola neebe lokaliza iha Munisípiu Bobonaro nia laran, maibe sira idak-idak muda fali ba sira nian munisípiu, la hatene sira liu husi meus ida neebe hodi fila ba sira nian munisípiu, tanba husi Edukasaun Bobonaro rasik la hatene ida nee.
“Nee identifika antes tinan foun, iha fulan Outubru ho Novembru 2025 nia laran mak ami identifika ita nian bolsa kandidatu profesores sira nee, sira nee hanorin iha nibel ensinu baziku ninia, agora muda ba sira nian munisípiu ami la hatene,” tenik nia.
(jac)
