BAUKAU, STLTIMORLESTE.com – Governu liu husi Ministeriu Obras Publikas (MOP) sei selebra kontratu ho kompanhia iha tinan 2026 nee atu reabilita estrada husi Aslaitula ba Vikeke Vila no ba Postu Uatukarabau no Uatulari iha Munisipiu Vikeke.
Ministru Obras Publikas, Samuel Marçal rekoinhese, estrada ligasaun husi Postu Administrativu Ossu liu-liu diresaun husi Aslaitula ba Postu Administrativu Vikeke Vila, Munisipiu Vikeke, tinan naruk ona difikulta movimentasaun transporte publiku no privadu, tanba kondisaun aat.
Nunee mos estrada diresaun ba Postu Uatulari no Uatukarabau durante nee difikulta tebes komunidade sira nia movimentasaun ho transporte sira, maibe seidauk halo reabilitasaun, tanba nee Governu sei responde estrada hirak nee.
“Hau espera katak kompromisu Governu nian mak sei asina hotu kontratu iha tinan 2026,” hateten Ministru Samuel ba STL iha Vila Antiga Baukau, Sesta (06/02/2026).
Tuir Governante nee katak, sei asina kontratu iha tinan 2026 nee, tanba prosesu sira preparadu ona no kontratu nee sei selebra ba estrada sira neebe identifikadu no prioridade atu reabilita hanesan estrada ligasaun husu Vikeke Vila ba Postu Uatukarabau no Uatulari, Aslaitula ba Vikeke Vila no estrada sira iha fatin seluk tan.
“Hau dehan tiha ona problema nee laos iha nee deit, mais iha fatin barak sei prezisa tebes, maibe ita laos halo hotu iha loron ida, maibe prosesu lao hela,” katak nia.
Nia sublina, governu nia kompromisu mak atu hadia infraestrutura baziku sira hanesan estrada hodi nunee bele fasilita movimentasaun transporte publiku no privadu asesu ho diak.
Entretantu inisiu tinan 2026, Governu liu husi Ministeriu Obras Publikas lansa ona fatuk dahuluk ba estrada urbana iha Munisipiu Baukau no Ermera.
(tom)
