DILI, STLTIMORLESTE.com – Estudante nomos inan aman sira kontenti bainhira programa merenda eskolar nee lao hikas ona iha eskola sira, tanba bele ajuda estudante no inan aman sira poupa osan gastu nian ka sosa hahan nian.
Iha semana dahuluk fulan ida nee nian eskola sira hahu halao hikas programa merenda eskolar bá estudante sira. Programa ida nee ajuda tebes estudante sira iha eskola, tanba la senti hamlaha durante prosesu aprendizajen nomos inan aman sira bele halo poupansa osan gastu nian bá labarik sira.
Estudante Eskola Sao Pedro, Melia da Costa dehan, senti kontenti tanba merenda eskolar lao fali ona, se lae too rekreu tenke buka hahan para sosa no loron-loron inan aman tenke fo hela deit osan hodi sosa hahan bá han. Agora merenda eskolar lao ona nee inan aman fo deit osan foto kopia no transporte bá mai uma nian deit ona.
“Hau kontenti kuandu merenda eskolar lao fali ona, se lae nee ami tenke hasai osan hodi sosa fali etu hodi han para aguenta too eskola nee sai. Han ona hanesan nee, ami nia pai ho mae bele hamenus ona osan han nian mai ami. Se lae loron-loron pai ho mãe tenke hasai osan barak bá ami nia foto kopia, trasnporte nomos bá han nian. Nee halo ami mos hanoin fali inan aman sira,” dehan nia bá jornalista STL iha Kampung Baru, Sesta (06/2/2026).
Nia dehan, nuudar estudante agradese bá governu, tanba bele prepara mos ai-haan bá ami durante iha eskola, liu husi programa merenda eskolar ida nee.
Nunee mos Estudante EBF 12 Outubru, Joaquin Rebelo hatete, agora merenda eskolar iha ona, neebe inan aman lalika fo tan osan han nian ona, fo deit mak transporte nian para bá mai eskola no uma.
“Ami nia merenda eskolar nee lao tiha ona iha Tersa nee, agora ami han fali ona iha eskola. La presiza lori osan han nian ona, apa ho ama haree deit mak osan kareta nian bá hau,” dehan nia.
Nia katak, hahan neebe sira han nafatin hanesan tinan kotuk nian no hahan sira nee diak hotu.
Entretantu Fornesedor Programa Merenda Eskolar iha EBF 12 Outubru Tasi-Tolu, Genia de Jesus S. Rodrigues hatete, merenda eskolar iha eskola ida hahu ona iha Tersa (03/01/2026), maibe nee tanba ho situasaun orijenti neebe Xefe Eskola sira rona informasaun nee iha dia 2 no iha tuku 2 loraik mak Xefe Sentru nian foin bá foti osan. No Sira rona informasaun nee iha tuku 4 loraik, mak enkontru hamutuk iha fatin sentru eskola 30 de Agusto no rona informasaun katak eskola mak jere, nee mak hodi implementa daudaun nee.
Nia dehan, tanba situasaun orijenti nee mak sira implementa tuir ekipa jestaun merenda eskolar halo iha tinan kotuk. Uluk tempu ekipa jestaun nian modo tahan, bee moos ho ai sunu forenesedor mak hola, restu nee ekipa jestaun mak kompras.
Kompras bá programa merenda eskolar nee iha oin rua, nee mak ekipa jestaun kompras sorin no fornesedor kompras sorin. Kona-ba dadus estudante nian mos implementa tuir dadus anterior, maibe nee tanba situasaun orijenti.
“Bá tinan ida nee nian iha Sabadu nee mak emi sei enkontru no tuir formasaun fali mak foin rona fali atu halao buat foun fali ka nafatin ho tinan kotuk sira liu bá nee,” dehan nia.
Nia afirma, osan bá programa merenda eskolar nee ba kada alunus ida 0,42 centavos, maibe kuandu sura fali hahan iha sira nia bikan laran nee US$ 0,35 centavos, restu husi nee uza bá selu cozinha sira no sosa ai sunu, bikan kanuru, rinso no mama lemon sira. Neebe total orsamentu nee tuir dadus estudantes sira nian.
Tuir nia, menu merenda eskolar nian mak hanesan Segunda naan bifi karau, Tersa Cuzado, Kuarta manu tolun, Kinta koto daan ho naan, Sesta mak foremungu. Aifuan neebe uza hodi han tuir menu neebe iha maioria hudi mak barak liu, tanba Timor Leste nee aifuan menus, neebe barak liu mak hudi, seluk nee menus. Maibe kona-ba buat sira husi sentru mak kompras, hanesan fornesedor tuir deit.
(dom)
