DILI, STLTIMORLESTE.com – Prezidente Republika (PR) Jose Ramos Horta hatete, viajen ba Emiradus Arabes Unidus (EAU) iha programa rua neebe importante.
Prezidente Republika Jose Ramos Horta ba jornalista sira iha Aeroportu Internasional Nicolau Lobato, Bairo Pite, Sesta (06/02/2026) hatete, nia viajen ba EAU iha programa rua, ida partisipa Premiu Zayed ba Fraternidade Umanu 2026 iha Memorial Fundador fatin istoriku ba asina dokumentu kona-ba Fraternidade Umana iha tinan 2019, seluk partisipa iha Simeira Governu Mundial nian iha Dubai, hamutuk iha sesaun plenaria ida kona-ba forma governasaun iha futuru.
“Hau ba Emiradu Arabe Unidu tanba programa rua, ida fraternidade umana neebe ketak nee hanesan instituisaun ida internasional neebe hahu ho deklarasaun fraternidade umana iha Fevereiru 2019, Amu Papa Francisco ho Saserdote Boot Islamiku iha Mundu (Grande Iman) Al-Azhar, Ahmad Al-Tayyeb, iha tinan 2019 iha EAU, liu husi neeba sira kria premiu internasional ida naran premiu Fraternidade umana,” dehan Prezidente Republika.
Xefe Estadu hatete, tinan-tinan iha loron 4 Fevereiru halo serimonia solene boot entrega premiu ba sira neebe manan, iha 2020 no 2021 Prezidente rasik sai membru juri mandatu, tinan 1 liu tiha sira sempre konvite Prezidente hodi fo apoiu oin-oin ba sekretariadu ba desizaun neebe sira halo.
Serimonia diak tebes, premiu nee kada tinan boot liu tan partisipasaun ema barak iha mundu, ho prezensa Prezidente EAU, liu tiha serimonia Prezidente mos ba partisipa eventu seluk simeira lider Prezidente no Governu ba Governasaun, no dezenvolvimentu nee Visi Primeiru Ministru Francisco Kalbuady Lay mak partisipa hahu kedas iha dia 3, 4, 5 maibe Prezidente asiste iha dia 5 tanba iha dia 3, 4 iha Abu Dhabi.
Aleinde nee Prezidente Prezidente Republika Jose Ramos Horta hamutuk ho lider mundial partisipa abertura Human Fraternity Majlis iha Abu Dhabi, serimonia abertura ba Human Fraternity Majlis iha Museu Nasional Zayed neebe foin inaugura iha Abu Dhabi, nuudar parte husi International Zayed Award for Human Fraternity ba dala-3.
Eventu nee halibur lider mundial, formulador polítika no espesialista umanitariu sira durante vizita ofisial Prezidente nian EAU.
Aleinde nee Prezidente Republika mos hasoru malu ho lider balun iha Abu Dhabi oinsa halo kontrusaun asrama ba estudante feto sira, neebe sei halao iha Palasiu Prezidensial nia sorin, tempu badak halo primeira pedra.
“Liurai boot husu hau presiza saida tan, liurai boot hatete buat neebe Prezidente Ramos Horta husu ami prontu atu ajuda, hau la husu buat ruma konkretu tanba sei koalia lai ho Primeiru Ministru mak foin bele haree, no sira prontu atu halo hospital ida, hospital foun, nee hau hatete sim ou não tanba hau tenke rona Primeiru Ministru, karik dehan nee prioridade ida, Ministru Saude uluk konhese tiha ona no hatete depois mak ita nia Ministra Saude bele telefone ba nia konfirma hakarak presiza sira halo hospital foun ho buat seluk tan iha setor saude ho setor neebe ita presiza, tanba sira hakarak apoiu makaas duni,” dehan PR Horta.
Prezidente Republika hatete, viajen ba EAU rezultadu diak tebes no Timor Leste nia naran ativu iha neeba.
(eme)
