DILI, STLTIMORLESTE.com – Oras nee daudaun mosu polemika ou duvidas husi sidadaun no Sosiedade Sivil ba rekrutamentu membru Polisia Nasional Timor Leste (PNTL) foun tinan 2025, Prezidente Republika (PR) Jose Ramos Horta hatete, nia labele fo komentariu maibe entrega ba Primeiru Ministru (PM) Kay Rala Xanana Gusmão.
Daudaun nee Sosiedade Sivil nomos sidadaun neebe konkore ba iha PNTL preokupa ho sistema no deskonfia katak naran neebe pasa nee maioria husi veteranus nia oan inklui mos membru PNTL ativu sira nia oan, oinsa Prezidente nia haree ba ida nee, hatan ba kestaun nee Prezidente Republika hatete, entrega ba Primeiru Ministru Kay Rala Xanana Gusmão, nia mak iha esperiensia hodi buka solusaun.
“Nee hau entrega ba Primeiru Ministru mak hatene, Primeriu Ministru esperiensia liu hau, se ema ruma konhese veteranu sira nia oan, ema ruma konhese polísia ativu sira nia oan nee Primeiru Ministru mak konhese, laiha ema seluk,” dehan Prezidente Republika Jose Ramos Horta ba jornalista sira iha Aeroportu Internasional Nicolau Lobato, Komoro, Dili, Sesta (06/02/2026).
Prezidente Republika hatete, nia apoiu desizaun neebe foti husi IX Governu Konstitusional neebe lidera husi Primeiru Ministru Kay Rala Xanana Gusmão.
“Nee duni hau konfiansa todan 100% ba Primeiru Ministru, buat neebe Governu deside hau apoia,” dehan Xefe Estadu Ramos Horta.
Sosiedade Sivil husu atu anula desizaun neebe daudaun iha, hatan ba kestaun nee Prezidente Republika hatete, nia seidauk haree prosesu tomak, tanba nee labele fo komentariu. “Hau seidauk haree prosesu nee, hau labele atu anula desizaun nee ka la anula,” katak Horta.
(eme)
