BAUKAU, STLTIMORLESTE.com – Komunidade sira iha Bairu Suria Timor, Aldeia Lutumutu, Suku Tirilolo, Postu Administrativu Baukau Vila, Munisipiu Baukau, sente trauma ba ameasa balu husi oknum ida.
Liu husi komunikadu de Imprensa portavos David Cabral konta, iha loron 01 Fevereiru 2026 purvolta tuku 09:00 kalan, deskonfia oan husi oknum Primeiru Sarjentu inisial G daudaun iha FALINTIL-Forsa Defeza Timor Leste (F-FDTL) nuudar Aman no Inan nuudar membru Polisia Nasional Timor Leste (PNTL) ativu iha Komando Polisia Munisipiu Baukau, lori ema halo problema iha Bairu Suria Timor.
Nia sublinha, ba problema refere parte komunidade iha Bairu Suria Timor la hatene nia kronolojia, maibe mosu derepente no iha problema refere oan husi Primeiru Sarjentu nee konsege halo dezentendimentu ho polisia iha estrada publiku hodi perturba movimentasaun.
“Akontesimentu nee inisial G nia oan konsege halo dezentendimentu ho polisia sira ho aten barani dehan polisia nee milisia no asu, ikus nia inan nuudar ajente polisia neebe ho farda kompletu halai sae mai iha ami nia oin hodi hateten katak imi bairu ida nee mak asaltu lisuk hau nia oan mas kuidadu,” hateten Porta Voz liu husi konferensia imprensa neebe realiza iha Bairru Suria Timor, Sesta (06/02/2026).
Nia konta, husi dezentendimentu nee parte komunidade sira husu polisia neebe prezensa iha fatin akontesimentu atu asegura sidadaun refere, maibe iha pesoal ajente intelijensia sira haruka komunidade nonok.
Nunee komunidade sira iha Bairu Suria Timor nonok hanoin parte polisia husi Komando Polisia Munisipiu Baukau detein ona sidadaun refere iha sela Komando, maibe aman neebe deskonfia nuudar Primeiru Sarjentu tula nia oan ba uma hela fatin.
Hafoin tula tiha nia oan ba uma no aman refere fila hikas iha Bairu Suria Timor hodi hakilar no buka sidadaun neebe halo problema ho nia oan.
“Nia aman G mai fali hodi hakilar iha bairu laran halai tun sae no dehan buka ema ida baku nia oan nee, tun tiha ba ami nia Aman Gauterus nia uma, maibe portaun taka, sai fali komesa duni labarik sira hamriik iha estrada ninin entaun senhor Julião Aparício hakbesik aan ba nia hodi koalia didiak ba nia, atu bele koopera hamutuk buka ema sira neebe halo problema, maibe nia ho egoizmu, ameasa dehan katak mangame imi sira nain rua tolu hanesan nee musan rua tolu kona tiha imi, Polisia no PM mos sei la mai kaer hau, maibe hau rasik mak sei entrega aan ba Tribunal,” portavos nee haktuir.
Portavos nee hatutan, aleinde ameasa refere fo mos ameasa seluk hanesan atu konvida ema sunu no halo eviksaun komunidade sira iha Bairu Suria Timor. Nunee husu Komando F-FDTL no PNTL atu foti medida ba ajente nain 2 refere.
“Povu baibain nia oan mak halo hanesan G nia oan, ami fiar katak polisia sama tiha ona nia no oras nee sei iha sela laran. Tebes lei nee so vale ba povu nia oan. Ami husu ba Komando F-FDTL no PNTL atu foti medidas ba ajentes nain rua nee. Se ajente PM neebe defende nia rai mak imi prosesu ona nia, mak ida nee merese duni foti medidas hasoru sira,” Porta voz nee sujere.
Iha fatin hanesan, komunidade Julião Aniceto Aparício “Loriko” neebe hetan amesa husi inisial G haktuir, asaun neebe isinial G nia oan halo iha Bairru Suria Timor, komunidade sira iha bairru refere la hatene ninia kronolojia, maibe derepente mosu.
“G tun mai, hau dehan se iha problema mai ita ba buka tuir ema sira neebe baku maun nia oan nee, nia la responde, siak deit ona imi sira kuandu mangame hau tiru musan ida rua imi latan iha nee nein kualker F-FDTL, Polisia mosu mos la kaer hau. Hau la satisfas kuandu instituisaun ida mak tun koalia liafuan hanesan nee hatun dignidade instituisaun 2 nee osan mean nasaun nian maibe hakarak tiru hau nia ulun, hau la halo krime ida,” Julião konta.
Asaun ameasa nee halo Julião la satisfas, tanba instituisaun hanesan F-FDTL no PNTL osan mean nasaun nian, maibe G tenta hatun dignidade instituisaun 2 refere, tanba se bainhira G tiru komunidade sira iha bairru refere ho kilat musan, seguransa husi instituisaun 2 refere labele kaptura nia.
Julião espresa sentimentu triste, tanba la halo asaun ruma ba G nia oan, maibe G hasai ameasa ho armas musan no lamenta ho G nia atitude, tanba pesoal ida husi instituisaun estadu nian hatudu hahalok imoral.
Nunee Julião komenta, konferensia imprensa neebe realiza laos keixa G ba Instituisaun F-FDTL no PNTL, maibe konferensia imprensa refere nuudar meius ida fo hanoin ba Komando F-FDTL no PNTL atu foti medida ba G nia hahalok neebe hatudu ba komunidade sira iha Bairru Suria Timor.
Too notisia nee publika, STL seidauk halo konfirmasaun ho Komandante Komando Polisia Munisipiu Baukau, tanba okupadu ho serimonia lansamentu fatuk dahuluk ba projetu reabilitasaun estrada urbana Baukau Vila neebe realiza iha Vila Antiga Baukau, iha loron 6 Fevereiru 2026.
(tom)
