DILI, STLTIMORLESTE.com – Kandidatu neebe mak la submete ba prova mediku, balun hahu hatoo reklamasaun ba Ministeriu Interior (MI).
“Reklamasaun hahu oin hatama ona, maibe ida nee ita rasik mak tenke hatoo. Tenke kandiatu rasik mak reklama nia aan,” hatete Portavós Komisaun Rekrutamentu ba vaga membru PNTL foun 2025, Superintendente Polísia António da Luz ba jornalista sira iha CFP, Tersa (10/02/2026).
Nia dehan, prosesu kuandu ema ruma la satisfas iha dalan legal atu hatoo rekursu.
“Ema ruma mak sente ofendidu nia bele ba halo rekursu, nunee husu ba kandiatu sira neebe la satisfas, ohin ami loke ona ba ita boot sira hodi halo reklamasaun ba ita nian aan, la satisfas ita boot sira rasik mak reklama katak la satisfas ba prosesu nee, ida nee laos ema seluk mak halo reklamasaun, kuandu la satisfas ita hatoo keixa tanba ita labele limite ema, tanba ita nasaun demokrátiku, se deit bele hatoo keixa, ema sira iha sekretariadu bele halo justifikasaun,” nia esplika.
Nia tenik, agora daudaun iha kandidatu ida ka rua sira nia reklamasaun no reklamasaun nee tenke submete ba iha Gabinete Ministeriu Interior neebe mak sira estabelese sekretariadu komisaun rekrutamentu.
Nia deklara, razaun reklamasaun kandidatu sira tenke submete ba iha Ministeriu Interiór nee tanba tuir diploma ministeriál númeru 17/2025 hateten katak, buat hotu-hotu neebe kona-ba rekursu ba rekrutamentu nee tenke submete ba Ministeriu Interior, tanba nee mak ekipa neebe estabelese simu reklamsaun bele submete ba iha Ministru Interior para reklamasaun sira nee tuir lei neebe iha.
Nia loalia, diploma ministerial númeru 17/2025 bele koalia klaru kedas kona-ba kouta neebe fahe ba modalidade haat, ida mak veteranu nia oan, PNTL, feto no mos ba iha publiku.
Maibe depoisTribunal Rekursu hatun artigu 42 númeru A ,B no C neebe kosta iha diploma ministerial numeru 17/2025 nee inkonstitusionál, tanba nee kandidatu hotu aplika ba iha jerál.
“Buat neebe agora daudaun mosu katak teste mediku nee PNTL nia oan no veranus nia oan nee opiniaun públiku, nee direitu ema ida nian atu halo ida nee,” nia Informa.
Nia dehan, se mak la satisfás ho prosesu nee iha dalan legal neebe iha, komisaun halao nia knaar tuir lei neebe iha.
Nia tenik, laiha irregularidade iha prosesu nee, tanba hahu husi prosesu lubuk ida verifikasaun ba dokumentu sira nee hotu ema nee prienxe mak nia pasa.
“Ita haree no verifika didiak prosesu hotu, ita haree ba dokumentu mak ita halo nia pasa nee, se mak la satisfas iha prosesu ida nee karik, detekta buat ruma mak lao laos ba ida nee, hau hanoin nia iha direitu atu ba keixa pesoál. Sekretariadu nee tenke responde ba buat legál neebe mak iha,” nia hatutan.
Nia argumenta, komisaun rekrutamentu iha kestaun ida nee lakohi fundamenta tanba prosesu teste nee hakarek iha despaisu ministerial nee elemitariu nee ba teste médiku, kuandu pesoal nia kondisaun mak ba deteta ema nee moras tanba lei hateten hanesan entaun tenke elimina.
“Ida nee mak rezultadu, ita labele taka buat neebe sira hetan, tanba nee mak komisaun iha obrigasaun tenke taka sai sé mak pasa, la pasa tenke ser taka sai,” nia loalia.
Nia haktuir, rezolusaun neebe iha katak presiza 400 pesoas, ida nee legal, neebe ida nee hakerek ona iha rezolusaun Governu numeru 9/2025 .
“Ida nee mak ita halao tuir, ita la envolve buat neebe mak laos hateten iha lei ida nee mak lei hateten,” nia afirma.
(jen)
