DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JF, tanba komete krime hasoru lezada FD.
Iha inidisiu sufisiente katak, ofendida moris hamutuk ho arguidu hanesan feen laen iha tinan 2024, iha oan mane ida no ekonomikamente dependensia ba malu.
Iha loron 28 fulan Abril tinan 2025, por volta 12h15, ofendidu ho arguidu diskute malu iha uma, maibe la rezolve hodi idak-idak ba halo sira nian servisu.
Por volta 22h15 kalan, arguidu ba iha ofendida nia servisu fatin Hospital Nacional Guido Valadares (HNGV) hodi bolu ofendida, maibe nia la sai ba hasoru tanba atende hela pasiente sira.
Arguidu hein ofendida la sai mai hasoru nia, tanba nee nia tama ba hodi liman basa dala ida iha hasan parte karuk rezulta moras no moe hodi sai ba iha liur.
Arguidu duni tuir ofendida hodi liman tuku dala ida iha kanuruk no rasta ofendida atu fila ba uma, maibe nia la hatan tanba sei iha oras servisu, arguidu kontinua lori liman basa dala ida iha hasan karuk rezulta moras.
Ofendida hateten ba iha arguidu hodi dehan hein lai hau ba foti pasta, tanba tauk ofendida tama ba iha sala funsionariu no mediku sira nia hodi asegura nia aan.
Konsekuensia husi agresaun nee halo ofendida senti moras iha fatin atinjidu no trauma tanba halo asaun iha pasiente sira nia oin.
Arguidu hatene katak bainhira lori liman basa ofendida nia hasan kauza moras, maibe nia halo nafatın.
Arguidu halo krime ho livre, deliberada, konsentemente no hatane katak hahalok nee proibidu no hetan pena tuir lei.
Tanba nee konsidera arguidu hanesan autor material ba krime violensia domestika Lei numeru 7/2010 ho forma ofensas integridade fizika simples previstu iha artigu 145 husi kodigu penal.
Hatan ba akuzasaun nee arguidu hili direitu nonok, tanba nee Tribunal deside rona deklarasaun husi lezada.
Iha sala julgamentu laran lezada deklara katak, momentu neeba mosu problema tanba osan.
Lezada deklara, iha sira nia uma dader lezada ho arguidu diskute malu tanba osan, arguidu haruka lezada fo ATM ba arguidu maibe lezada lakohi fo. Ho ida nee mak lezada ba tiha servisu fatin, arguidu tuir ba hodi basa lezada.
Rona tiha arguidu no lezada, Tribunal husu atu tama kedan ba iha faze alegasaun.
Iha alegasaun nee Prokurador deklara katak, husu Tribunal atu aplika pena suspensaun ba arguidu atu iha futuru arguidu labele pratika aktu refere.
Enkuantu husi parte defeza nian.husu Tribunal atu aplika pena neebe kmaan.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz estajiadu nain ida, Ministeriu Publiku reprezenta husi Prokurador nain ida, arguidu hetan asistensia legal husi Defensor Publiku Manuel Sarmento.
(ter)
