DILI, STLTIMORLESTE.com – Reuniaun Konselhu Ministru (KM), Kuarta nee (11/02/2026) deside suspende ba rekrutamentu ajente Polísia Nasionál Timor Leste (PNTL) foun tinan 2025, tanba deskonfia iha pratika favoritizmu no familiarizmu iha prosesu selesaun.
Nia dehan, desizaun nee foti hafoin membru Governu sira hetan informasaun preliminar kona-ba alegasaun irregularidade iha prosesu rekrutamentu ajente PNTL foun.
Nia informa, Konselhu Ministru konsidera katak presiza halo avaliassaun klean no independente atu garante transparensia, justisa no meritu iha prosesu rekrutamentu ba instituisaun seguransa nasionál.
“Ita rona hotu reklamasaun oin-oin, depois ida nee ami lori mai iha Konselhu Ministru tanba abertura konkursu mos Konselhu Ministru mak aprova. Entaun, hau lori mai Konselhu Ministru hodi husu autorizasaun atu foti desizaun, tanba nee mak ohin mai aprezenta iha Konselhu Ministru deside katak primeiru ita suspende tiha lai konkursu nee rasik,” hatete Ministru Interiór (MI), Francisco da Costa Guterres ba jornalista sira iha Palasiu Governu, Kuarta nee (11/02/2026).
Nia deklara, suspende tiha konkursu nee tanba presiza halo uluk averiguasaun, análize didiak mak foin publika sai.
“Segundu, Konselhu Ministru mandata hau atu re-estrutura fali komisaun verifikasaun no suprevizaun, komisaun ida nee kompostu husi entidades oin-oin, ita inklui tan mos ema internasional hanesan Guarda Nacional Republicana (GNR) husi Portugál no husi Austrália ho tan ema balun neebe mak ho diak, atu nunee bele fo servisu ba sira loron 20 para atu halo revizaun tomak ba revizaun konkursu nee rasik,” nia deklara.
Nia hatutan, depois iha loron 20 nee mak haree no rekomenda mai liu husi Ministériu Interiór depois hatoo ba Konselhu Ministru kona-ba medida saida mak bele foti. Suspensaun nee laos atu hapara rekrutamentu permanente, maibe atu fo tempu ba autoridade kompetente sira halo auditoria no verifikasaun dokumentu hotu-hotu neebe liga ba prosesu selesaun kandidatu sira.
“Se hetan problema ruma ita bele halo revizaun totál ba ida nee ou bele mos halo fila-fali parsialmente konkursu lao para ninia konkursu nee lao ho diak,” nia argumenta.
Nia afirma, komisaun verifikasaun nee sei mai husi Portugál, Austrália no Ministériu Edukasaun, tanba sira mak fasilita prova kultural ba sira.
(jen)
