DILI, STLTIMORLESTE.com – Relasiona ho jogu online neebe akontese iha Otel Oe-Upu Rejiaun Administrativu Espesial Oe-Cusse Ambeno (RAEOA) no mos jogu lotaria Dragon nian neebe akontese iha Dili, oras nee daudaun prosesu investigasaun kontinua lao hela iha Ministeriu Publiku (MP).
Tuir Prokurador Jeral Republika, Nelson De Carvalho katak, jogu online neebe akontese iha Oecusse arguidu balu iha ona Prizaun Preventiva (PP), tanba nee investigasaun kontinua lao hela.
“Ita boot sira hatene jogu online hanesan Dragon no Oecuse nian prosesu nee iha hela investigasaun nia laran, arguidu balu mos iha hela Prizaun Preventiva, kona-ba Dragon nian mos investigasaun lao hela,” dehan PJR ba jornalista sira iha Kolmera, Kinta (12/02/2026).
Nia hatutan, kazu sira neebe arguidu iha Prizaun Preventiva nee masimu liu tinan 1, maibe kuandu prosesu investigasaun termina ona prepara ona akuzasaun, bele julga ona.
Rekorda katak, antes nee kazu Online neebe iha Oecusse, iha prosesu Primeiru Interogatoriu, arguidu balu hetan medida Prizaun Preventiva.
Ba kazu Lotaria Grand Dragon, Tribunal Judisial Primeira Instansia Dili (TJPID) halao prosesu primeiru interogatoriu ba arguidu nain tolu ho insial NGT, VJ no MFDPM.
Arguidu sira submete ba iha Tribunal, tanba deskonfia loke jogu ilisitu online iha jogu lotaria Grand Dragon. Tanba nee Ministeriu Publiku liu husi Prokurador Turnu Rafael Gusmão no João Marques promove arguidu sira ho krime explorasaun jogu ilísitu neebe previstu iha artigu 322 no brankamentu kapital neebe previstu iha artigu 313 husi Kodigu Penal Timor Leste.
Prosesu refere iha faze alegasaun Prokurador Rafael Gusmão no João Marques solisita ba Tribunal atu aplika medida Proibisaun de Aujensia no medida kausaun ho valor osan US$ 10.0000 ba arguidu sira, tanba konsidera pratika krime jogu ilisitu ba online no krime brankamentu kapital.
Iha alegasaun defeza husi arguidu nain tolu Advogadu Privadu, José Ximenes husu Tribunal atu aplika Termu Identidade Rezistensia (TIR) ba arguidu sira, tanba jogu Lotaria Grand Dragon legal no iha dokumentu lisensa sei moris hela hodi selu taxa ba Estudu.
Rona tiha alegasaun, ikus mai Juiza turnu deside aplika medida Aprezentasaun Periodika ba arguidu nain tolu, atu aprezenta an iha Ministeriu Publiku (MP) kada semana ida dalan ida hodi kontinua investigasaun.
Prosesu nee prezinde husi Juiza Zulmira Auxiladora, Ministeriu Publiku reprezenta husi Prokurador nain rua Rafael Gusmao no João Marques, arguidu nain tolu hetan asistensia legal husi Advogadu Privadu Jose Ximenes.
(ter)
