DILI, STLTIMORLESTE.com – Tribunal Judisial Primeira Instansia Dili (TJPID) halao prosesu sumariu ba arguidu inisial JCS, tanba naok lezadu inisial CS nia helem.
Arguidu lori mai iha Tribunal, no parte Ministeriu Publiku (MP) promove arguidu ho krime Furtu Simples.
Iha prosesu nee Juiz estajiariu, Alfoncios Costa halo tiha identifikasaun ba arguidu JCS, no ikus mai deside tama ba iha faze alegasaun husi Ministeriu Publiku no parte Defeza nian.
Nunee iha alegasaun Ministeriu Publiku reprezenta husi Prokurador Aderito Tilman, husu Tribunal atu aplika medida koasaun Termu Identidade Rezidensia (TIR) no pena multa ba arguidu, tuir kondisaun arguidu nia tanba arguidu sei estudante.
No parte defeza husu Tribunal atu aplika desizaun tuir konviksaun Tribunal nia.
Rona tiha alegasaun nee, Tribunal deside aplika medida koasaun Termu Identidade Rezidensia (TIR) no selu multa 30 dolar tanba arguidu konfesa.
Prosesu nee prezide husi Juiz estajiariu nain ida, Ministeriu Publiku reprezenta husi Prokurador Aderito Tilman no arguidu hetan asistensia legal husi Defensor Publiku Anzelmo Akara.
Tuir kronolojia katak, kazu nee akontese iha loron 7 fulan Janeiru tinan 2026, iha Hospital Nasional Guidu Valadares (HNGV).
Momentu neeba arguidu foti lezadu CS nia helem, tanba nee Polisia detein kedan arguidu hodi submete ba prosesu sumariu iha Tribunal.
(ter)
