DILI, STLTIMORLESTE.com – Prezidente Republika (PR), Jose Ramos Horta nomeia Ministru Defeza (MD), Kontra-Almirante Donaciano da Costa Gomes, nuudar enviadu espesial ba Misaun Bons Ofísiu CPLP iha Guine Bissau.
Prezidente Republika, liuhosi Dekretu Prezidensial n.º 13/2026, iha loron 9 fulan-fevereiru, nomeia Ministru Defeza, Kontra-Almirante Donaciano da Costa Gomes, nuudar Enviadu Espesial Prezidente Republika nian ba Misaun Bons Ofísiu Komunidade País sira Lian Portuges (CPLP – sigla iha lian portuges) iha Guine Bissau, neebe sei halao husi loron 17 too loron 21 fulan Fevereiru, 2026.
Tuir komunikadu neebe STL asesu husi Portal Governu kinta lokraik (12/02/2026) hatete, desizaun nee halo hafoin Konferensia Estraordinaria I hosi Xefe Estadu no Governu CPLP nian, neebe halao iha loron 16 fulan-dezembru tinan 2025, iha neebe Republika Demokratiku Timor Leste asumi Prezidensia Pro Tempore (ho tempu determinadu) organizasaun nee too tinan 2027, hafoin Guine Bissau hetan suspensaun hosi atividades hotu-hotu iha CPLP.
Hanesan hatuur ona iha Dekretu Prezidensial, Misaun nee halo viajen ba Gine-Bisau “ho objetivu prinsipal atu halo mediasaun laos deit ba libertasaun imediata no inkondisional ba ema hotu neebe detidu hafoin krize iha loron 26 fulan Novembru, maibe mós atu hasai kedas orden urjente konstitusional hanesan kondisaun.
Tuir alínea b) husi artigu 87. Konstituisaun Republika Demokratika Timor-Leste, Prezidente Republika dezigna Ministru Defeza nuudar nia Enviadu Espesial hodi reprezenta Estadu Timoroan iha misaun altu nível CPLP nee.
Delegasaun nee inklui reprezentantes husi Angola no Saun Tome no Prínsipe no planeia atu hasoru malu ho Ministru Negósius Estranjeirus no Koperasaun Guine Bissau nian, Altu-Komandu militar, reprezentantes hosi sosiedade sivíl no entidade sira seluk.
Misaun nee hanesan parte husi responsabilidade neebe Timor Leste assume hodi ezerse Prezidensia Pro Tempore CPLP nian ba períodu 2026-2027.
(eme)
