DILI, STLTIMORLESTE.com – Dosentes husi Institutu Siensia Saude (ICS) durante tinan ida nia laran, hetan formasaun lian Portuges husi Ministeriu Ensinu Superior Siensia no Kultura (MESSK).
Reitor ICS, Leão Borges hatoo kestaun nee ba STL, Segunda (16/02/2026).
“Hau hanoin durante nee ami nia dosentes sira tuir hela formasaun lingua Portuges nian husi ita nia Ministeriu Ensinu Superior, neebe agora dadaun nain hira atu simu ona sira nia sertifikadu, dosentes neebe atu simu ona sira nia sertifikadu nee nain hat ou lima,” nia dehan.
Tuir Reitor ICS nee katak,dosentes sira nee tuir formasaun lingua Portuges durante tinan ida nian laran, dosentes neebe partisipa iha formasaun nee ho nivel lisensiatura, maestradu, tanba durante nee sira sempre partisipa iha formasaun ba lingua refere.
Nunee mos Reitor East Timor Coffee Institute (ETCI) Mateus Maia de Jesus, hatete formasaun lingua nian ba dosentes sira nee importante tebes, para bele fo kapasitasaun neebe mak diak ba dosentes Sira iha nibel ensinu superior ida-idak.
“Formasaun lingua nian ba ita nian dosentes Sira nee importante tebes,para bele fo kapasitasaun neebe mak diak ba dosentes Sira iha nibel ensinu superior ida-idak,tanba formasaun nee husi MESSK,” nia haktuir.
Entretantu Ministru Ensinu Superior Siensia no Kultura (MESSK) Jose Honorio da Costa Pereira Jeronimo, antes nee hatete atu aposta ba iha kualidade iha ensinu superior maka Ministeriu Ensinu Superior nafatin halao formasaun lingua Portuges ba dosentes sira, hodi nunee bele aumenta konhesimentu ba dosentes sira iha lingua Portuges ninia.
“Ita atu aposta ba iha kualidade iha ensinu superior maka Ministeriu Ensinu Superior nafatin halao formasaun lingua Portuges ba dosentes sira, hodi nunee bele aumenta konhesimentu ba dosentes sira iha lingua Portuges,” nia informa.
(jac)
