DILI, STLTIMORLESTE.com – Ministeriu Administrasaun Estatal (MAE) sei konstrui sala aprendizajen neen (6) ho andar, no tuir planu sei halo iha fulan Marsu ou Abril tinan nee nia laran.
“Atu halo konstruksaun ba ami nian sala aprendizajen nen ho andar nee, orsamentu aprova tiha ona, neebe hein deit iha fulan Marsu ka Abril maka atu halo konstruksaun, konstruksaun nee ba ami nian sala nen, sala nen mak halo uluk, nee husi MAE mak halo,agora sala ida kotuk nee mak husi ME ho ajensia mak atu halo. Konaba orsamentu ba konstruksaun nee seidauk hatene, tanba seidauk hahu, bainhira hahu ona mak ita foin beke hatene lolos ninia montante orsamentu nee hira,” dehan Direitor EBC Manleuana, Carlos Correia ba STL, Segunda (16/02/2026).
Carlos dehan, agora dadaun sala ensinu aprendizajen iha EBC Manleuana hamutuk 15,total professores hamutuk 41, total estudantes hamutuk mil novi sentus setenta oetu, no Sira presiza atu aumenta sala aprendizajen.
Entretantu Superintendente Edukasaun Munisípiu Dili, Cesarina C. Guterres, hatete, liu husi monitorizasaun neebe maka durante nee Sira halo iha eskola balun neebe presiza aumenta sala de aula, no balun presiza halo konstruksaun foun ninia, tanba nee, balun hahu aumenta sala aprendizajen ba estudantes sira.
“Liu husi monitorizasaun neebe maka durante nee Sira halo iha eskola balun neebe presiza aumenta sala de aula,no balun presiza halo konstruksaun foun ninia, tanba nee balun hahu aumenta sala aprendizajen ba estudantes sira,” nia komenta.
Iha fatin seluk, Diretor Servisu Edukasaun Munisipiu Bobonaro, Miguel Freitas, dehan tinan ida nee SEM Bobonaro nafatin identifika kondisaun infransturtura eskola, maibe tanba dadaun nee udan hela, depois mak ami sei halo kontinuasaun, ita nian eskola 13, nee pre eskolar hotu,” nia dehan.
“Iha tinan kotuk ami identifika ona ita nian ensinu pre eskolar hamutuk 13, husi numeru nee ualu halo konstrusaun foun, no lima reabilitasaun, agora ba tinan ida nee ami nafatin identifika ita nian infransturtura eskola,atu nunee ita bele hatene lolos katak hira mak tama ba konstrukaun foun no hira ba reabilitasaun ninian,” nia deklara.
(jac)
