DILI, STLTIMORLESTE.com – Prezidente Republika (PR) Jose Ramos Horta hato’o parabens no kongratula ba Embaixador Boa Vontade ba Assuntu Ambiente no Kultura, Ego Lemos tanba hetan Medal of the Order of Agricultural Merit husi Embaixador Fransa.
Serimonia entrega Medal of the Order of Agricultural Merit husi Embaixador Fransa ba Embaixador Boa Vontade ba Assuntu Ambiente no Kultura, Ego Lemos halao iha Palasiu Prezidensial Nicolau Lobato, Dili, Segunda (16/02/2026).
Prezidente Republika liu husi diskursu hato’o parabens ba Ego lemos no Prezidente rekonhese Ego Lemos merese hetan duni Medal of the Order of Agricultural Merit husi Embaixador Fransa.
“Parabens dahuluk ba Ego Lemos. Nia merese tebes rekonhesimentu husi Ministru Agrikultura Republika Franseza, no laos deit kompozitor ida no artista sira, maibe sai ona ambientalista boot ida,” dehan Prezidente Republika.
Xefe Estadu hatete, hafoin eleitu nuudar prezidente, konvida Ego Lemos nomeia nia nuudar Enviadu Espesial ba rekursu bee nian, polítika ambiental, no partisipa iha enkontru nasional no internasional barak.
Nunee mos Embaixador Fransa ba Indonezia, Timor-Leste, no ASEAN, Fabien Pinone hatutan, hato’o agradese ba Prezidente Republika Jose Ramos Horta tanba bele fo fatin hodi realiza serimonia entrega medalla nee.
“Uluk nanain hatoo hau nia agradesimentu ba Prezidente Republika tanba simu ita ohin iha Palasiu istoriku ida-nee, tanba Fransa hakarak fo onra ba personalidade ida neebe ativu no famozu liu iha Timor Leste, Eugenio Lemos, neebe konhesidu liu ho naran Ego Lemos, Embaixador Boa Vontade ba Assuntu Ambiente no Kultura nian,” dehan nia.
Embaixador dehan, Ego Lemos moris iha Timor Leste, iha Maiu 1972, iha ligasaun metin ho istoria Timor Leste nian.
Nunee mos Embaixador Boa Vontade ba Assuntu Ambiente no Kultura, Ego Lemos sente onradu tebes hamriik iha oin, hodi simu Medal of the Order of Agricultural Merit husi (Orden Meritu Agríkola).
Rekonhesimentu ida nee husi Republika Fransa, laos deit marku pesoal ida, ida-nee hanesan testamentu ida ba reziliensia husi rai-Timor no ninian povu nia matenek.
“Fransa ho Timor-Leste bele haketak husi Oseanu sira, maibe ita unidu hiusi lia-loos fundamental ida katak klamar hosi nasaun ida hetan iha nia rai. Tradisaun Franseza husi terroir – fiar katak karakter husi fatin ida reflete iha saida maka nia produz, hetan espellu perfeitu ida iha nee iha Timor-Leste,” dehan Ego Lemos.
Nia hatutan, liu husi PERMATIL nia serbisu no apoiu boot husi parseiru sira hotu, buka atu fo onra tanba Timor nia foho sira laos hanesan foho-lolon maran sira, maibe hanesan esponja sira neebe hein atu nakonu. Haree lei tradisional sira, hanesan Tara Bandu, laos hanesan relíkia sira pasadu nian, maibe hanesan enkuadramentu final ba governasaun ambiental modernu.
“Ohin, ita selebra Kuda Bee, Haburas Komunidade. Iha Timor-Leste laran tomak, inklui rejiaun sira hanesan Oe-cusse no Atauro, ita prova ona katak ita presiza duni ita-nia komunidade nia liman, liuliu juventude no siensia ita-nia beiala sira nian,” katak nia.
Nia hatutan, peskiza nee konfirma ona saida maka katuas sira sempre hatene bainhira halo neineik, mout, no habelar udan liuhusi kolam retensaun no swales, no kuda espesie ai-horis neebe loos, rai fo rekompensa ba, no haree ona aumentu 71% iha vejetasaun iha tempu maran iha fatin projetu sira. Ida-nee laos deit estatístika ida, ida-nee hanesan eskudu verde ida hasoru mudansa klimatika. Ida-nee maka seguransa ai-han. Ida-nee maka restaurasaun dignidade ba agrikultor rural sira.
Nia hatete, simu meritu ida-nee hodi PERMATIL nia naran, PERMATIL GLOBAL, Asosiasaun Juventude Perma no voluntariu rihun ba rihun, Movimentu Kuda Bee Juventude Perma neebe maka pasa sira nia loron iha loro-matan okos hodi kee kolam retensaun, swales, no kuda ai-horis sira.
(eme)
