DILI, STLTIMORLESTE.com – Prezidente Republika (PR) Jose Ramos Horta iha Domingu (15/02/2026), prezide serimonia boas-vindas ba Naviu Marinha Fransés Auguste Bénébig iha Portu Dili akompanha husi Embaixador Fransa, Fabien Penone no membru Governu sira.
Iha biban nee liu husi diskursu, Prezidente Republika Jose Ramos Horta hatete vizita Naviu Marinha Fransés Auguste Bénébig nee reprezenta simbolu forte husi amazide rai rua.
“Vizita husi Naviu nee nia reprezenta simbolu forte ida husi amizade neebe dura entre nasaun rua nee,” dehan nia.
Tuir Prezidente, inisiativa sira hanesan nee esensial tebes hodi haburas estabilidade rejional no afirma fila-fali kompromisu hamutuk ba seguransa marítima iha Indo-Pasífiku.
Iha intervensaun, Prezidente destaka kona-ba kooperasaun neebe luan entre Timor-Leste no Fransa iha setor oioin, inklui enerjia matak, infraestrutura, no vijilansia marítima.
Xefe Estadu refere, espesialmente iha investimentu, Franses iha projetu enerjia solar eskala boot iha Manatuto no dezenvolvimentu Portu Baía Tibar, hanesan ezemplu konkretu husi parseria ida neebe luan liutan.
Prezidente mos enkoraja envolvimentu boot liu hosi setor privadu Franses iha area enerjia renovavel no turizmu sustentavel, tanba setor sira nee importante tebes ba diversifikasaun ekonomika no hadia reziliensia klimatika Timor-Leste nian.
Iha serimonia nia rohan, Xefe Estadu hatudu nia agradese ba apoiu kontinuadu hosi Fransa ba integrasaun rejional Timor-Leste iha ASEAN, no mos ba kontribuisaun iha dezenvolvimentu kapital umanu.
Ramos-Horta sublinha katak, relasaun bilateral nee harii iha valor demokratiku partilladu no respeitu ba direitu internasional, no reafirma kompromisu ba orden internasional ida neebe bazeia ba regra sira, konfiansa, no multilateralizmu.
(eme)
