BAUKAU, STLTIMORLESTE.com – Komunidade sira tenke forma naruk iha edifisiu Balkaun Uniku, Munisipiu Baukau, hodi trata kartaun Billeti Identidade (BI) orijinal.
Joven Fernando Maria da Silva espresa sentimentu triste, tanba iha loron 09 Fevereiru 2026 prezensa ona iha edifisiu Balkaun Uniku Baukau atu trata kartaun Billeti Identidade, maibe la konsege tama iha edifisiu laran, tanba prezensa ema barak trata Billeti refere. Nunee iha loron 16 Fevereiru nee kontinua prezensa iha edifisiu Balkaun Uniku Baukau atu trata kartaun Billeti refere, maibe seidauk hetan oportunidade tama ba edifisiu laran.
“Atendimentu iha nee halo ami triste tebes, tanba hau mai iha segunda semana kotuk mos labele tama no ohin mai fila fali mos nafatin seidauk tama ba edifisiu laran, tanba ema barak atendimentu nee impata tebes ami jovem sira nia oportunidade,” Jovem Fernando Maria da Silva hateten ba jornalista sira iha resintu edifisiu Balkaun Uniku Baukau, Segunda (16/02/2026)
Nia konsidera, atendimentu kartaun Billeti Identidade original iha edifisiu Balkaun Uniku Baukau nee difikulta tebes jovem sira, tanba labele hetan lalais kartaun refere hodi kompete vaga sira iha rai laran neebe daudaun publika no vaga ba rai liur liur, tanba vaga sira neebe daudaun husi kompanhia lokal no internasional publika ba publiku atu kompete balu prezisa mos kartaun Billeti Identidade original.
Nia mos lamenta ho atendimentu kartaun Billeti Identidade original iha Balkaun Uniku Baukau, tanba semana orariu ba atendimentu Billeti Identidade fo deit oportunidade ba ema nian 100.
“Tuir orariu neebe sira fo sai semana ida atende dala rua deit Segunda no Tersa, maibe loron ida sira simu deit ema nain 50, hau hanoin nee fo impaktu tebes mai atu, tanba balu mai forma madrugada kedas ami mai tuir iha ona kotuk too remata mos ami la hetan fatin atu tama, tanba sira tama uluk nee pas ona 50 orang,” Fernado katak.
Hatan ba kestaun nee, Koordenador Balkaun Uniku Munisipiu Baukau, Euclides Ornai hateten, atendimentu ba komunidade sira neebe trara kartaun Billeti Identidade original, Balkaun Uniku Baukau iha regras rasik neebe taka ona iha kuadru avizu kada loron atedimentu nian simu ema nain 50, maibe haree ba komunidade sira forma naruk Balkaun Uniku simu liu nain 50 ba iha atedimentu kartaun refere.
“Loloos nee ita nia jestaun simu nain 50, maibe agora daudaun komunidade mai barak balu mai emerjensia hakarak lori ida nee ba servisu iha rai liur maioria jovem sira entaun Balkaun Uniku foti dezisaun, la simu 50 maibe ita simu hotu kedas,” Euclides argumentu.
Nia deklara, mezmu orariu neebe taka sai limita komunidade sira loron ida simu deit nain 50, tanba atu kuida makina fargo labele avaria lalais, maibe haree ba situasaun komunidade sira nia forma iha edifisiu Balkaun Uniku Baukau, no hahu simu sira nia dokumentus iha loron 09 Fevereiru besik rihun 1, mak Balkaun Uniku foti dezisaun muda hodi simu komunidade sira liu tarjetu neebe iha no too ohin loron produz ona kartaun Billeti Identidade original ba komunidade hamutuk 300 resin.
“Ita husu nafatin ba komunidade sira neebe mak mai hatama sira nia dokumentus atu hetan original, pasiensia hein ita sei emprime hotu kedas,” Euclides enkoraja.
Iha atendimentu nee komunidade sira balu forma hahu iha tempu madrugada kedas, maibe koordenador nee lakohi fo sala ba komunidade sira, tanba nesesidade komunidade sira nia obrigado tenke forma iha tempu madrugada, maibe husu atu nafatin pasiensia no promete sei produz hotu kartaun Billeti Identidade original ba sidadaun sira neebe presiza.
(tom)
