DILI, STLTIMORLESTE.com – Polisia Nasional Timor-Leste (PNTL) liu husi Komandu Munisípiu Díli, kontinua kaptura tan suspeitu nain rua (2) ba kazu violasaun koasaun seksual ho raptu neebe akontese iha Hali-Dolar, Hera, loron 28 fulan Dezembru 2025.
Nia dehan, PNTL Munisipiu Dili halo kapturasaun ba suspeitu sira bazeia ba Tribunal Judisial Primeira Instansia Dili nia mandadu neebe hasai konaba mandadu detensaun ho Nuc: 0487/25.DIBCR, hodi buka tuir no kaptura suspeitu sira hodi aprezenta ba Tribunal, atu bele responsabiliza ba aktu neebe sira komete tuir lei neebe vigora ona.
Antes nee, Autoridade Polisia kaptura ona suspeitu nain-rua ho inisial JG ho UF iha loron Segunda (09/02), no kaptura tan suspeitu nain rua ho inisial IX ho MN neebe deskonfia envolve mos iha kazu refere.
“Relasiona kazu violasaun no kazu koasaun seksual ho raptu akontese iha loron 28 fulan-Dezembru tinan 2025, iha Postu Administrativu Kristu-Rei, area Hali Dolar, Hera, iha semana ida liu ba, kaptura ona arguidu nain rua ho inisial JG ho UF no aprezenta ona ba iha Tribunal, oras nee daudaun sira ba ona iha pena prizaun preventiva.
Iha Segunda (16/02/2026), kaptura tan suspeitu nain rua ho inisial IX ho MN hodi detein iha sela detensaun Polisia hodi aprezenta ba Tribunal iha oras 72 nia laran,” hatete Komandante PNTL Munisípiu Díli, Superientendente Xefe Polisia Orlando Gomes ba jornalista sira iha Eskuadra Polísia Dom Aleixo, Segunda-feira (16/02/2026).
Nia informa, nain rua nee kaptura iha area Vera-Cruz nian maske iha suspeitu ida mak la kolabora ho parte seguransa, maibe konsege kaptura lori mai detein iha Komandu Munisípiu Dili.
“Arguidu inisial IX kaptura iha Caicoli no MN kaptura iha area Santa Cruz nian, maibe suspeitu ida MN nee mak kolabora ho diak, nia mai aprezenta an iha Komandu, suspeita ho inisial MN kolabora ho diak no suspeitu IX la kolabora ho polisia, maibe ita nafatin foti nia mai,” nia koalia.
Enkuantu suspeitu nain rua ho inisialJG ho UF neebe antes nee kaptura, lori ba aprezenta ona iha tribunal no hatun ona despaixu Prizaun Preventiva, no Komandu Munisípiu Dili nafatin kumpri bainhira mandadu husi tribunal tun ba Komandu Dili.
Entretantu iha loron Kinta (05/02/2026), Seksaun Polísia Investigasaun Munisípiu Dili kaptura Suspeitu JG iha Lospalos Vila lori too mai iha Komandu Munisípiu Dili mais ou menus tuku 18.00 liu.
Iha loron Sesta (06/02/2026), polisia seksaun investigasaun kontinua ba kaptura suspeitu UF iha Ainaro no kontinua mai asegura iha Komandu Munisípiu Dili iha oras 16.00 liu. Suspeitu hirak nee lori kedas ba iha edifísiu Sub-Seksaun Polísia Unidade Vulnerabilidade (VPU) no kontinua ba detein iha sela Polisia.
(jen)
