DILI, STLTIMORLESTE.com – Selebrasaun Misa Quarta-Feira Cinzas, sarani sira simu ahu kdesan ho sinal Cruz tau iha rentos “Ita Mai Husi Rai, Sei Fila Fali Ba Rai.”
“Santa Kreda dader ida nee konvida ita hahu Quaresma hodi simu ahu kdesan, rai rahun neebe iha oras-oras tan tau iha ita nia rentos fo hanoin mai ita husi rai ita mai no ita sei fila ba rai nee, katak ita ema fraku, frajil, mortal,” hatete Arsebispu Metropolitana Dili, Dom Virgilio Cardeal do Carmo da Silva, SDB liu husi omilia wainhira prezide Misa Quarta-Feira Cinzas iha Igreja Katedral, Kuarta (18/2/2026).
Dom Virgilio hatete, tinan rihun mai too tempu ida nee ema nafatin empasazem perante universu ema kriatura kiik kiak, iha universu nee los duni rai rahun oan ida, maibe rai ida neebe folin tebes iha Maromak nia oin, rai rahun ida neebe Maromak hadomi, Maromak tan hadomi hodi halibur iha nia liman no rai rahun ida nee huu iis fo moris.
“Ahu kdesan oras-oras tan kose ita nia rentos fo hanoin mai ita perkursu ita nia ezistensia, husi rai rahun ba moris, ita nee rai rahun husi rai tahu, maibe husik ita nia aan iha Maromak nia liman, nia halo ema sai kriatura ida furak tebes. Maibe dala barak liu-liu iha susar laran, ita nia solidaunita haree deit mak rahun, maibe Maromak enkoraja ita, ita moris tanba Maromak hadomi ita, no ema moris sai duni Maromak nia oan. Ita rahun ida neebe presiozu folin boot destinadu atu moris ba nafatin, rai rahun neebe kontein Maromak nia mehi, ita mak Maromak nia esperansa, ita mak riku soin no ita mak Maromak nia Gloria,” hatete Dom Virgilio Cardeal do Carmo da Silva, SDB.
Bibi atan Uma Kreda nee hatete, iha inisiu Quaresma nian nee mai tau iha konta, tanba sa iha Quaresma laos tempu atu Maromak haraik todan ba ema hirak nebe moris sabraut, moris aat iha sala, maibe atu rekonhese maske iha mizeria Maromak hadomi ema, nee tempu grasa nian, tempu atu simu Maromak nia domin mai sarani sira, no haree ba tulun ema atu muda moris.
Tanba ema iha mundu ida hakat husi rai rahun ba moris, nee duni sarani sira laos kose rai rahun ba esperansa, nunee mos kose rai rahun ba Maromak nian iha sarani sira, ema la rende ba ida nee.
Oinsa ema iha konfiansa ida nee, mundu neebe nakonu ho buat aat oin-oin no tauk aat oin-oin, iha violensia sosiadade ida neebe valor Kristaun, valor sarani hasoru dezafiu oin-oin, fiar Sarani mos mihis daudaun, maibe fiar katak Maromak bele transforma sarani sira nia rahun, ninia Gloria.
“Rahun neebe ita simu iha rentos tenke boot duni, ita hanoin katak ita Maromak nia oan, labele moris atu asegura fali, rai rahun neebe mohu, perguntas neebe ita husu ba ita nia aan, hau moris ba saida, hau moris buat hirak neebe pasa fila ba rai rahun, nega buat hotu neebe Maromak halo iha moris, se hau moris deit atu halibur deir osan oituan lori ba uma, moris fo ksolok ba aan, moris buka prestizu oituan iha sosiadade, moris atu kareira neebe diak, karik moris ida nee fo hanoin ema halibur deit mak rai rahun karik.
(joa)
