DILI, STLTIMORLESTE.com – Konsumidor barak iha kapital Dili hahu kestiona kualidade sasan importasaun husi Xina, liu-liu sapatu no ekipamentu eletronika sira neebe dala barak aat lalais, maski uza semana ida deit.
Fenomenu nee hamosu preokupasaun tanba maski folin bratu, konsumidor sira tenke gasta osan barak liu hodi sosa fali sasan foun iha tempu badak nia laran.
Hanesan iha merkadu no mos sentru komersial sira iha Dili laran sasan hanesan sapatu ho presu US$ 5 too US$ 12 no telemovel mak sai kategoria neebe ema sosa barak liu, maski nunee durabilidade husi sasan sira nee sai kestaun prinsipal.
“Hau sosa deit sepatu nee foin liuba loron neen, ohin nakloke ona, ami osan neebe laiha nee sosa bratu nee para poupa osan, afinal ikus mai ami tenki sosa fali ida foun fali,” dehan Costantino de Araujo konsumidor ida neebe, foin sosa sapatu foun iha Timor Plaza, Dili, Kinta (19/02/2026).
Iha parte seluk Vendedor Jaimito da Silva rekonhese katak sira fo opsaun kualidade neebe la hanesan ba konsumidor ka kliente sira. Nia esplika katak sasan neebe tama mai Timor-Leste (TL) iha kategori oioin, husi kualidade aas too kualidade neebe uza dala ida aat ona.
“Ami faan tuir deit saida mak konsumidor sira buka, ema barak mai husu sasan neebe folin baratu liu.Ami mos fo hatene katak ida folin baratu nee ninia kualidade la hanesan ho ida folin karun, maibe konsumidor ka kliente sira nafatin hili ida baratu nee tanba osan la too,” dehan vendedor nee.
(car)
