BAUKAU, STLTIMORLESTE.com – Servisu Munisipal Edukasaun Baukau sei solusiona problema laiha kaderneta orijinal iha eskola Ensinu Baziku Filial (EBF) Katolika São Domingos Savio Baukau.
Problema laiha kaderneta orijinal iha eskola EBF Katolika São Domingos Savio Baukau infrenta tinan 6 ona no problema refere parte eskola relata ona ba Servisu Munisipal Edukasaun Baukau maibe seidauk iha resposta. Nunee tinan 6 nia laran laiha kaderneta orijinal husi Ministeriu Edukasaun atu priense estudante sira nia valor.
Durante nee eskola tenke utiliza deit meius kopia kaderneta orijinal iha sura tahan mutin hafoin priense estudante sira nia valor husi ezame sira hodi fahe ba estudante sira inan aman iha tempu distribuisaun kaderneta nian tuir orariu Ministeriu Edukasaun kada tinan.
Hatan ba kestaun nee, Diretor Servisu Munisipal Edukasaun Baukau, Afonso dos Santos da Costa hateten, mezmu eskola refere Katolika, maibe responsabilidade ba kaderneta sira husi Ministeriu Edukasaun no problema neebe daudaun eskola nee infrenta hanesan laiha kaderneta, tanba falta informasaun husi parte eskola ho Edukasaun Munisipal kona-ba asuntu refere.
“Hau sei komfirma ho sira lojistik kaderneta iha karik fo ba sira, tanba prinse deit iha provizoriu nee fo impaktu, durante nee sira laiha informasaun,” Afonso dos Santos da Costa hateten ba STL iha Vila Nova Baukau, Kinta (19/02/2026).
Diretor Servisu Munisipal Edukasaun Baukau nee husu dirijente eskola EBF São Domingos Savio atu hatoo preokupasaun sira nunee estok iha nivel Munisipal laiha relata ba Nasional hodi oferese labele nonok deit, tanba nee importante mak komunikasaun no koordenasaun ba problema sira nunee bele fo solusaun.
(tom)
