DILI, STLTIMORLESTE.com – Polisia Nasionál Timor Leste (PNTL) Munisípiu Díli asegura ona suspeita ho inisial HRA neebe sona nia laen inisial AM iha Aldeia Naroman, Suku Madohi, Postu Administrativu Dom Aleixo, Munisípiu Díli.
Nia konta tuir kronólojia husi parte polísia katak, kazu violénsia domestika nee akontese iha Domingu nee, tuku 15:45 OTL, bainhira vitíma ho inisiál AM halo hela servisu hadia telefone, derepente mak suspeita ho inisial HRA ho tudik sona vítima iha nia servisu fatin, sona kedas iha vítima nia kelen parte loos, hodi rezulta kanek no raan sai makass.
Komandante PNTL Munisípiu Díli, Superientendente Xefe Polísia Orlando Gomes informa, bainhira kazu nee akontese Polísia Batalhaun Orden Públiku (BOP) sira mos too kedas lokal akontesimentu no halo prevensaun iha momentu neeba.
Nia deklara, bainhira polísia too iha fatin akontesimentu, vítima nia família entrega suspeita ba PNTL ho evidensia tomak hodi lori mai iha Eskuadra Polísia Dom Aleixo, nunee kontinua halo prosesu.
“Tanba kazu nee flagrante delitu, entaun suspeita ita hatama ba sela detensaun durante oras 72 no vítima evakua kedas ba hospitál hodi halo tratamentu,” hatete Komandante PNTL Munisípiu Díli, Superientendente Xefe Polísia Orlando Gomes ba jornalista sira iha nia knaar fatin Komando PNTL Munisipiu Dili, Kinta (19/02/2026).
Nia informa, suspeita ita detein ona 72 oras, vítima agora halo hela tratamentu iha hospitál seidauk bele presta nia deklarasaun, tanba ho kondisaun sei iha tratamentu nia laran.
Entretantu kazu nee akontes iha Domingu (15/2/2026), maizumenus oras 15:45 OTL, kazu feen uza tudik sona laen, kazu nee PNTL konsidera violénsia domestika, mais ida nee hanesan tentativa omisidiu tanba suspeita ho tudik sona katuas oan la konsege mate, mais sona iha kelen. Tanba suspeita atu sona tan vítima nia isin lolon mak vítima nia aman haree hodi hadau tiha tudik, kazu nee nia motivu seidauk hatene tanba vítima sei halo hela tratamentu.
(jen)
