BAUKAU, STLTIMORLESTE.com – Autoridade Suku Kaibada Makasae, Postu Administrativu Baukau Vila, Munisipiu Baukau, tinan nee prioridade atu kanaliza bee moos ba komunidade sira no halo reabilitasaun estrada ba aldeia.
Informasaun nee hatoo husi Xefe Suku Kaibada Makasae, Julio Alegria Belo ba STL iha Vila Nova Baukau, Sesta (20/02/2026).
“Planu prioridade PNDS nian ba tinan 2026 nian mak kanalizasaun bee moos ba ita nia komunidade iha area Borubaha no Maulame ho mos melhora estrada ba Aldeia Kaiubilale ho Maulame,” nia dehan.
Nia esplika, razaun Autoridade Suku Kaibada Makasae prioridade ba bee moos, tanba komunidade iha Aldeia Borubaha durante nee nia asesu bee tenke lao distansia dook hafoin too iha bee matan. Nomos komunidade iha Aldeia Maulame durante nee konsumu deit bee posu, nunee sei halo kanalizasaun ba bee moos hodi fo asesu ba komunidade sira.
Nia sublina, kanalizasaun refere Autoridade identika ona bee matan 3 mak hanesan bee matan Komuloli Uakinari no Muadugu iha area Suku Kaibada Makasae nian.
“Husi bee matan Uakinari ho Muadugu ba Maulale kuaze 3 kilometru sei fo asesu ba 39 xefe familia no ba Borubaha 1 kilometru atu fo asesu ba 126 xefe familia,” Julio Alegria Belo fundamenta.
Nia komenta, planu prioridade seluk hanesan halo reabilitasaun estrada, tanba estrada ba Aldeia Kaiubilale kilometru 3 no ba Aldeia Maulame kilometru 3 neebe daudaun nee kondisaun aat, nunee Autoridade aposta ona iha planu atu fasilita komunidade sira nia movimentasaun ho transporte publiku ba merkadoria.
Nia informa, mezmu Autoridade Suku aposta ona planu, maibe seidauk hatene kona-ba data implementasaun, tanba ekipa Programa Nasional Dezenvolvimentu Suku (PNDS) husi Postu Baukau Vila seidauk estabelese ekipa PNDS iha Suku Kaibada Makasae.
“Ami sei hein prosesu husi PNDS Postu estabelese uluk tiha lai ekipa mak foin hatene montante orsamentu ba kanalizasaun bee moos no estrada ida nee,” katak Julio Alegria Belo.
Entretantu Suku Kaibada Makasae iha populasaun hamutuk 2.160 husi xefe familia 500 resin neebe rejistu iha Aldeia 4 mak hanesan Aldeia Borubaha, Kaiubilale, Datawa no Maulame.
(tom)
