BAUKAU, STLTIMORLESTE.com – Komando Polisia Munisipiu Baukau liu husi Seksaun Polisia Tranzitu kada semana halao auto stop dala tolu (3) iha estrada publiku territoriu Munisipiu Baukau nian.
Komadante Komando Polisia Munisipiu Baukau, Superintendente João Sancho Pires esplika, inisiu tinan 2026 Komando Jeral Polisia Nasional Timor-Leste alerta ona ba Komando Polisia Munisipiu sira inklui Komando Polisia Munisipiu Baukau atu rutina halo auto stop ba transporte publiku no privadu.
Nunee Komando Polisia Munisipiu Baukau kumpri ordem, orienta Polisia Tranzitu realiza ona auto stop iha semana datoluk fulan Fevereiru nee husi loron 19 too loron 20 nee, prende ona dokumentus motor no kareta hamutuk 50 resin inklui prende motor unidade 27 neebe daudaun asegura ona iha edifisiu Komando Polisia Munisipiu Baukau atu aplika koima ba infrator hirak nee.
Maibe Komando Polisia Munisipiu Baukau liu husi Polisia Tranzitu matein ordem realiza nafatin auto stop kada semana dala 3 iha estrada publiku territoriu Munisipiu Baukau nian.
“Auto stop pelu menus semana ida ita halo dala tolu swping nee loro-loron atu nunee ema bele respeita regras tranzitu nee i respeita mos sira nia aan utiliza dala nee lao diak labele hetan asidente, tanba ita nia liman ain ulun la faan iha loja,” Komadante Komando Polisia Munisipiu Baukau, Superintendente João Sancho Pires informa ba jornalista sira iha nia knaar fatin Vila Nova Baukau, Sesta (20/02/2026).
Nia sublina, auto stop refere Polisia Nasional Timor Leste inisia tuir lei no nuudar meius ida atu eduka motorista sira evita asidente no eduka motorista respeita lei kodigu estrada hanesan motorista bainhira konduz transporte publiku no privadu asesu ona estrada publiku, tenke iha karta konduzaun, transporte neebe konduz tenke iha dokumentus no kompleta ho nia asesoria sira.
Nia fundamenta, aliende Polisia Tranzitu halo auto stop iha estrada publiku sei kobre eskola sira iha Munisipiu Baukau atu identifika estudante sira neebe konduz motor, tanba maioria laiha karta konduzaun.
“Ita mos tau prioridade orieta tiha ona tranzitu atu tama eskola sira nee orienta labarik minoridade labele uza motor, se sira nia tinan seidauk too diak liu inan aman haruka lao ain ou kareta ruma iha tula hela do que oan sira uza motor mozu asidente barak,” João Sancho Pires akresenta.
Iha fatin ketak, Diretor Servisu Munisipal Edukasaun Baukau, Afonso dos Santos da Costa apresia ho planu Komando Polisia Munisipiu Baukau nian atu kobre nivel eskola sira identifika estudante minoridade sira neebe daudaun utiliza morizada husi uma ba eskola, tanba liu husi meius tranzitu nian konbre iha nivel eskola mak bele fo solusaun ba estudante sira komprende sinais tranzitu neebe motan ona iha estrada publiku no lei kodigu estrada neebe eziste.
“Hau nia hanoin chek point nee diak tanba atu estudante sira komprende no aprende kona-ba sinais tranzitu oinsa lori motor uza kapasete neebe hau hanoin nee diak liu minimiza dezastre,” katak Afonso dos Santos da Costa.
Diretor Servisu Munisipal Edukasaun Baukau nee husu ba estudante sira nia inan aman atu hadomi nafatin oan sira no bainhira atu sosa motor ba oan ida hodi uza ba eskola tenke kontrola mos oan sira nia idade, tanba idade sidadaun ida neebe atu konduz motor tenke liu tinan 17. No bainhira sosa ona motor ba oan tenke kontrola mos dokumentu motor nian no orienta oan trara karta konduzaun atu nunee bele hatene sinain tranzitu neebe motan ona iha estrada publiku no la kontra lei kodigu estrada neebe eziste iha Timor Leste.
Entretantu tuir observasaun neebe STL asesu iha terrenu, durante loron rua ekipa Polisia Tranzitu Munisipiu Baukau halao atividade auto stop iha estrada publiku area Teulale diresaun Baukau-Laga no estrada publiku Tirilolo diresaun Vila Nova – Vila Antiga.
(tom)
