BAUKAU, STLTIMORLESTE.com – Tuir planu fulan Marsu tinan nee, Primeiru Ministru (PM) Kay Rala Xanana Gusmão sei hatuur fatuk dahuluk ba projetu reabilitasaun estrada Aslaitula iha Postu Administrativu Ossu, Munisipiu Vikeke.
Prezidente Autoridade Munisipiu Vikeke, Francisco Cruz Simões de Gonzaga Soares hateten, relasiona ho vizitasaun Primeiru Ministru nian ba Munisipiu Vikeke atu haree direita munisipiu nia preparativu ba dezentralizasaun poder lokal, no sei lansa mos projetu reabilitasaun estrada diresaun nasional no urbana iha Munisipiu Vikeke, neebe tuir planu sei hatuur fatuk dahuluk direita husi Primeiru Ministru Kay Rala Xanana Gusmão.
“Dalan nasional Ossu nian tun mai Aslaitula nian dehan katak fulan Marsu antes dia 10 sira nee sei iha lansamentu projetu sira neebe tau ona iha Vikeke Aslaitula,” Prezidente Autoridade Munisipiu Vikeke, Francisco Cruz Simões de Gonzaga Soares informa ba STL liu husi telefone, Domingo (22/02/2026).
Nia informa, vizita Primeiru Ministru nian iha Munisipiu Vikeke lansa projetu reabilita estrada iha fatin 2, mak hanesan estrada diresaun Aslaitula too Ossu Vila nia distansia kilometru pur-volta 15 no kontinua husi Ossu too Vikeke Vila, tanba iha estrada diresaun husi Ossu too Vikeke Vila iha parte balu neebe prezisa atu hadia, tanba aat. Aleinde mos lansa estrada rural diresaun husi Uairadek too Hospital Antigu hamutuk kilometru 7 resin neebe mos reabilita iha tinan nee.
Nia komenta, estrada diresaun refere prezisa duni halo reabilitasaun, tanba kondisaun aat iha neebe tinan naruk fo impaktu ba movimentasaun transporte publiku no privadu.
“Sim, sei lansa mak nee ita bele dehan katak nee pozitivu ona ho konstrui estrada Aslaitula nee Vikeke nia todan ita bele rezolve ona,” Francisco argumentu.
Prezidente Autoridade nee katak, bainhira projetu reabilitasaun estrada iha parte Aslaitula no Uairadek nian hahu no remata sei fo benefisiu ba povu agrikultores sira, tanba bele fo asesu vantajen movimentu transporte publiku sira atu transporta povu agrikultores sira nia produtu ba merkadu Munisipal no Nasional.
(tom)
