DILI, STLTIMORLESTE.com – Udan ho intensidade makaas neebe tuda rai durante oras lima resin horikalan, rezulta bee fakar no tahu tama komunidade nia hela fatin iha kapital Dili, nunee ohin dader Segunda-feira (23/02/2026), husi dadersan kedan sidadaun sira husi suku balu komesa halo servisu hamoos fali sira nia uma laran.
Tuir observasaun jornalista STL iha terenu haree katak, udan neebe iha horikalan nee mos rezulta drainazen barak mak nakonu ho foer, nunee bee la sulin halai tuir nia dalan no fakar sai ba estrada kaber no tama ba uma laran.
Hanesan iha area Suku Kaikoli, Bairo Pite no seluk tan bee sae too ain tur no lori tahu mean ho metan tama ba sala vizita no kozinha. Komunidade uza fali balde, aisar, kanuru no ekipamentu seluk hodi duni ka suru sai bee no tahu neebe nakonu.
“Udan horikalan nee boot tebes no kleur oituan. Ami la konsege toba tanba bee komesa tama. Ohin dader ami tenke hamoos kedan antes tahu nee maran no lori moras,” dehan Mariano Soares Alves, abitante ida neebe hela iha Suku Bairru Pite ba STL, Segunda (23/02/2026).
Problema neebe komunidade sira keixa mak kondisaun drainazen neebe kloot no nakonu ho foer hanesan plastik, kaisa, raihenek no seluk tan. Situasaun nee labele halo bee suli lalais ba tasi, nunee udan liu deit oras lima, inundasaun komesa mosu ona.
Too agora komunidade sira sei kontinua hamoos hela sira nia sasan no uma laran, maski laiha vítima neebe mate, maibe sasan hanesan kulsaun, roupa, livru eskola, sanyo no seluk tan hetan estraga tanba bee no tahu.
Entretantu Autoridade Lokal husu ba komunidade sira atu nafatin kuidadu aan, tanba tuir previzaun metereolijia udan sei tuun iha loron hirak oin mai. No tuir informasaun katak, komunidade Suku Bairo Pite barak mak afeta ba inundasaun iha horikalan la inklui fatin seluk neebe iha kapital Díli.
(car)
