BAUKAU, STLTIMORLESTE.com – Projetu reabilitasaun estrada urbana Baukau Vila diresaun husi area Nagardjo, Suku Bahu too iha area Suku Tirilolo, Postu Administrativu Baukau Vila, parte kompanhia sei halo alargamentu ba metru 17, neebe afeta mos ba uma komunidade balu, tanba nee afetadu husu Governu liu husi ministeriu relevante atribui uluk indemnizasaun molok sobu sira nia hela fatin.
Iha tinan liu ba ekipa konjunta husi Autoridade Munisipiu Baukau tau ona marka X kor mean ba uma komunidade sira nian neebe hela besik iha estrada diresaun husi Nagardjo too Vila Antiga nia ninin, tanba konsidera afeta ba reabilitasaun estrada urbana Baukau Vila.
Husi uma hirak neebe ekipa konjunta tau marka X kor mean, iha alagramentu estrada nee komunidade Afonso Carlos da Costa iha area Nagardjo, Suku Bahu, nia uma afeta, tanba ateru rai neebe halao husi kompanhia JOVA Constraction Unipessoal Lda too kedas nia uma tatis no parede neebe nia konstrui.
Nia dehan, hanesan sidadaun Baukau oan prontu kontribui tomak iha prosesu reabilitasaun estrada urbana Baukau Vila dezenvolvimentu, maibe presiza parte relevante sira kria uluk kondisaun, tanba rai neebe konstrui uma ba no afeta ba projetu reabilitasaun estrada urbana nee, estatutu laos rai estadu, maibe estatutu rai eransa no bainhira sobu deit sei fo impaktu ba familia iha uma refere.
“Nee fo impaktu duni, nee mak hodi bainhira diretor kompanhia mai husu kona-ba ida nee hau dehan, ida neebe kona ona ami koopera maibe kompanhia ho estadu kria uluk kondisaun ba ami,” komunidade afetadu Afonso Carlos da Costa ba STL iha Nagardjo Bahu, Segunda (23/02/2026).
Nia komenta, mezmu alargamentu estrada nee daudaun afeta ba nia uma, maibe laiha intensaun atu impede projetu nee, tanba dezenvolvimentu mak importante. Maibe hanesan sidadaun husu Governu liu husi ministeriu relevante kria uluk kondisaun liu husu fo indemnizasaun, nunee halo uma foun antes molok sobu uma tuan.
Hatan ba kestaun nee, Koordenador Tekniku Obras Publikas Destakadu Munisipiu Baukau, Diego Cipriano Caleza hateten, implementasaun projetu reabilitasaun estrada urbana Baukau Vila iha komunidade afetadu, tanba halo alagamentu ba estrada, maibe daudaun ekipa halo ona preparasaun atu halo identifikasaun.
“Ita seidauk bele halo identifikasaun konjunta, tanba foin lalais mak lansamentu entaun prepara kondisoens para tun halo identifikasaun ba afetadu sira nee,” Caleza katak.
Koordenador nee sublina, uma hirak neebe antes nee tau ona sinal atu sobu ou lae seidauk serteja, tanba liu husi dezenhu ba projetu reabilitasaun estrada refere iha ona dadus preliminar ba komunidade afetadu sira no ekipa sei halao ikas identifikasaun nunee bele hatene kategoria uma afetadu sira molok atribui indemnizasaun.
Nia informa, ekipa neebe atu halo hikas identifikasaun husi nasional, maibe bainhira mak marka prezensa iha Munisipiu Baukau atu identifika hikas komunidade afetadu sira, parte tekniku Munisipal seidauk hatene data serteja, tanba ekipa nasional sei okupadu ba projetu foun sira neebe atu implementa iha territoriu nasional.
Entretantu alagramentu iha projetu reabilitasaun estrada urbana Baukau Vila ho luan metru 17 husi area Nagardjo too Tirilolo, tanba halo estrada diresaun 2 parte klaran konstrui jardim estrada sorin sorin estabelese trotoar ba ema lao ain. No projetu nee responsabiliza husi kompanhia JOVA Construction Unipessoal Lda no Vage’el Unipessoal Lda.
(tom)
