BAUKAU, STLTIMORLESTE.com – Komunidade kestiona atendimentu ba Bilhete Identidade (BI) orijnal iha edifisiu Balkaun Uniku Munisipiu Baukau paradu.
Estudante husi Universitariu Katolika Timorense (UCT-sigla português), Virgina Pascoela Ximenes Mariz sente preokupadu ho atendimentu Bilhete Identidade orijinal iha edifisiu Balkaun Uniku Munisipiu Baukau, tanba atendimentu foin realiza iha loron 09 Fevereiru nee, maibe too iha loron 23 Fevereiru nee paradu ho razaun makina emprimedor fargo la konfortavel atu kontinua halao emprimesaun.
“Hau mai iha nee atu halo hau nia dokumentus BI, maibe hau too iha nee laiha atende, tanba dehan makina ladun konfortavel, nunee labele halo,” katak Virgina Pascoala Ximenes Mariz ba jornalista sira iha resintu edifisiu Balkaun Uniku Baukau, Tersa (24/02/2026).
Estudante UCT nee lamentavel tebes ho situasaun nee, tanba Bilhete Identidade mos nuudar dokumentus importante atu kompleta mos dokumentus sira seluk utiliza iha eskola ensinu superior, nunee prezensa iha edifisiu refere maibe laiha atendimentu.
Joven nee husu Governu atu hadia ona sistema atendimentu publiku sira iha Timor Leste hanesan iha nasaun seluk, tanba faktus hatudu atendimentu publiku liu-liu ba Bilhete Identidade nian iha Munisipiu Baukau, neebe foin emprime hikas Bilhete Identidade orijinal, maibe daudaun paradu, tanba makina fargon la konfortavel atu halo emprimesaun.
Hatan ba kestaun nee, Koordenador Balkaun Uniku Munisipiu Baukau, Euclides Ornai hateten, Balkaun Uniku Munisipiu Baukau daudaun nee provizoriumente la halo atendimentu ba sidadaun sira neebe atu trata dokumentus Bilhete Identidade, tanba dokumentus neebe simu husi sidadaun hahu iha loron 09 no 10 Fevereiru kontinua iha loron 16 Fevereiru nee, liu ona rihun ida no parte tekniku emprime ona kartaun Bilhete Identidade 300 resin, maibe iha kartaun balu fotografia la moos, nunee provizoriu atendimentu ba Bilhete Identidade paradu, tanba tenkinu sira sei hamoos makina emprimedor.
“Provizoriumente ita la halo atendimentu, tanba ita hakarak halo klening lai ba makina fargon nunee nia labele estragus blanku, tanba ita emprime sai naran balu laiha foto balu laiha,” Euclides Ornai argumentu.
Nia komenta, tuir jestaun Balkaun Uniku nian ba emprimesaun ba kartaun Bilhete Identidade orijinal unidade 50 kada loron atendimentu nian, maibe durante atendimentu Balkaun Uniku nian ba emprime kartaun orijinal kada loron atendimentu nian emprime 100 rezulta blaku orijinal ba Bilhete Identidade nian balu hetan estragus, tanba la moos, daudaun tenkinu sei halo klening makina refere.
Nia sublina, bainhira makina refere tekniku hamoos remata, Balkaun Uniku sei hatuur hikas nia jestaun kada loron emprime deit kartaun orijinal 50 no bainhira emprime hotu ona sidadaun rihun 1 resin nia hafoin Balkaun Uniku simu tan dokumentus foun husi sidadaun sira neebe atu trata Bilhete Identidade orijinal.
“Ita sujere aplikante sira neebe mai iha Balkaun Uniku hakarak trata Bilhete Identidade bele ba iha rejistu notariadu Munisipiu Baukau emprime provizoriu, tanba neeba mak nain lo-loos ba atendimentu sira nee,” Euclides sujere.
Enkuantu Diretora Diresaun Munisipal Konservatoriu Servisu Rejistu Notariadu Munisipiu Baukau, Justina das Neves Mendonça rekonhese, Diresaun Munisipal Konservatoriu Servisu Rejistu Notariadu mak nain lo-loos ba asuntu trata Bilhete Identidade no seluk tan, maibe razaun atendimentu halao fali iha Balkaun Uniku, tanba tuir akordu neebe Ministeriu Justisa no Ministeriu Administrasaun Estatal selebra ona, maibe ho razaun makina fragon iha edifisiu Balkaun Uniku Baukau enfrenta problema, daudaun la halo atendimentu.
“Makina avaria nee laiha buat ida, nee ema tekniku mak hatene, maibe importante ita nafatin atende komunidade sira, iha nee ita fo provizoriu tanba konservatoriu makina fargon avaria,” Justina komenta.
Nia katak, mezmu atendimentu ba sidadaun sira trata kartaun Bilhete Identidade orijinal iha Balkaun Uniku Baukau provizoriu laiha, maibe iha Diresaun Munisipal Konservatoriu Servisu Rejistu Notariadu Baukau nafatin lao tuir orariu neebe estabelese ona, maibe emprime deit provizoriu ba sidadaun sira, tanba makina fargon avaria.
Nia esplika, entre kartaun Bilhete Identidade provizoriu no orijinal diferente deit iha fiziku, tanba provizoriu emprime uza sura tahan mutin enkuantu orijinal emprime iha ninia blanku rasik, maibe entre rua nee dadus hanesan bele utiliza iha rai laran.
Maibe ba sidadaun neebe prezisa kartaun Bilhete Identidade orijinal, Diresaun Diresaun Munisipal Konservatoriu Servisu Rejistu Notariadu Baukau prontu ajuda liu husi karta akompanhamentu ba sidadaun neebe prezisa bele ba trara iha Konservatoriu Servisu Rejistu Notariadu Sentral iha Dili.
Enretantu tuir observasaun STL nian iha terrenu nota, sidadaun sira daudaun nee ho entusias forma iha edifisiu Diresaun Munisipal Konservatoriu Servisu Rejistu Notariadu Munisipiu Baukau, trata dokumentus Bilhete Identidade.
(tom)
