DILI, STLTIMORLESTE.com – Area jeografika neebe konhesidu ho naran Hudi Laran iha kapital Dili, nakfilak ka transforma total ona sai sentru negosiu foun neebe komunidade agora bolu ho naran “Xina Laran”, mudansa nee akontese tanba kresimentu investimentu husi negosiante estranjeiru liu-liu husi Xina neebe harii loja no armajen boot iha area neebe uluk nakonu deit ho hudi hun.
Tuir observasaun jornalista STL iha terenu haree katak, transformasaun nee muda tebes kor sidade Dili nian. Area neebe uluk kobre ho mahon husi plantasaun hudi nian, agora nakonu ho edefisiu oin oin, movimentu tranzitu neebe apertadu loron loron no seluk tan.
Sidadaun ida neebe hela besik iha area nee ho naran, Domingos Rosario hateten, Xina laran mosu rasik husi komunidade nia ibun, tanba fasilidade komersiu neebe domina husi empreza Xineza.
“Uluk nee ami bolu hudi laran tanba hudi hun barak tebes iha nee, agora hudi ida mos laiha ona, ema hotu mai iha nee sosa besi, ai, triplex sumenti no sasan seluk iha loja Xineza sira, tanba nee naran nee muda tiha deit ba Xina Laran mos diak,” dehan Domingos ba STL iha Hudi Laran, Dili, Tersa (24/02/2026).
Maski dezenvolvimentu nee lao lais nia mos kestiona kona-ba planeamentu sidade, ho aumenta iha edefisiu sira, sistema drainazen iha area nee presiza atensaun husi governu, liu liu iha tempu udan atu bele prevene inundasaun. Aleinde nee movimentu karreta boot sira neebe tula sasan tama sai iha tempu loron, hodi hamosu engrafamentu ka macet.
Nunee mos Observador Politika, Daniel de Carvalho Arajo hatete, transformasaun Hudi Laran ba Xina Laran nee lori impaktu pozitivu ba ekonomia lokal, tanba joventude barak hetan servisu hanesan seguransa no seluk tan. Nunee mos pupulasaun sira la presiza tan ba fatin seluk hodi sosa sasan nesesidade kontrusaun nian.
(car)
