DILI, STLTIMORLESTE.com – Eskola 12 Outobru lokaliza iha rohan parte Loro Monu husi Kapital Dili nian, neebe akumula estudante iha fatin nee hamutuk 2000 resin. Bainhira udan been tun, dalan neebe estudante sira asesu atu tama bá areador eskola nian nakfila tiha bá mota kiik, tanba udan been nalihun tiha iha dalan nee.
Xefi Koordenador EBF 12 Outubru Tasi-Tolu, Fernando Bareto dehan, depois udan iha Domingu kalan (22/02/2026), iha Segunda dader dalan neebe estudante sira atu asesu tama mai iha areadores eskola nian nakonu tiha ho udan been. Situasaun nee prejudika tebes estudante sira atu asesu tama mai eskola laran. Neebe estudante balun inan aman kous deit too tama bá resintu eskola nian, no estudante neebe inan aman la akompanha lori mai mak tara aan liu husi rede neebe igreja halo hela hodi tama mai eskola tuir prosesu aprendizajen. Iha loron Segunda nee ema barak los mak mai vizita eskola nee, husi Xefe Suku, Xefi Aldeia, Ministeriu, husi Edukasaun Munísipiu Dili nian mos mai observa hotu.
“Ami nia eskola nee horiseik (Red-Segunda), ema mai vizita barak los, husi Ministeriu Edukasaun, Xefe Suku, Xefi Aldeia, nomos husi Edukasaun Munísipiu Dili nian mai observa situasaun eskola nee nian. Iha areadores ka eskola laran laiha impaktu ida, impaktu mak iha liur deit. Tanba dalan atu tama mai eskola, dalan tama mai areadores eskola nian mak be nakonu, entaun halo estudante sira atu tama mai susar tebes,” dehan Nia bá STL iha EBF 12 Outubru Tasi-Tolu, Tersa (24/02/2026).
Nia katak, la signifika katak susar bá estudante sira atu liu lae, maibe tanba sira hatais hela sapatu ho farda eskola nian, entaun sira labele liu husi be laran hodi tama mai eskola, entaun inan aman balun rekupera ho eskola hodi kous sira nia oan tama mai eskola, no balun neebe la lao ho inan aman tara aan liu husi redi moru nian neebe igreja halo hela nee, para sira tama mai eskola laran. Ida nee mak situasaun horiseik nian iha eskola ida nee hasoru.
(dom)
