BAUKAU, STLTIMORLESTE.com – Prezidente Autoridade Munisipiu (PAM) Baukau, Veneranda Lemos informa ona insidende neebe akontese iha mota Mulia ba Governu Sentral.
Iha loron 22 Fevereiru 2026 neebe akontese udan ho intensivu makaas iha Munisipiu Baukau rezulta korente mota mulia boot hodi impede komunidade sira nia movimentu ho transporte publiku no privadu diresaun husi Postu Administrativu Baguia, Laga, Kelikai Antigu, Matebian no husi Postu Kelikai inklui diresaun husi Munisipiu Lautem ba Baukau Vila neebe konsege engarrafamentu iha mota refere durante oras naruk, tanba laiha ponte atu fasilita komunidade sira nia movimentasaun atu liu mota refere.
Nunee iha loron refere rezulta bebe feto ida ho idade fulan 4 neebe parte familia tula ho motor diresaun husi Dili ba Postu Administrativu Matebian, Munisipiu Baukau, maibe too iha mota refere haree mota tun nunee hein kleur too bebe refere hakotu iis.
“Ho akontesimentu sira iha Mulia ohin hau hakerek ona karta ba exelensia Ministru ESTATAL hodi bele kontinua ba Ministru Obras Publikas atu tau ida nee iha emerjensia, tanba kuandu mota boot barajen ida neebe halo iha mulia nee la tahan, tanba bele lori oras tolu haat nia laran mak bee foin tuun nee fo impaktu tebes ba ema sira neebe hasoru moras emerjensia sira nee, ami tau atensaun,” hateten PAM Baukau, Veneranda Lemos ba STL iha salaun apuramentu Vila Nova Baukau, Tersa (24/02/2026).
Nia sublina, haktuir akontesimentu iha mota Mulia ba iha Governu Sentral, Autoridade Munisipiu Baukau liu husi Ministru Administrasaun ESTATAL atu koordena ho Ministru Obras Publikas atu tau atensaun, tanba tinan barak ona difikulta movimentasaun transporte publiku no privadu iha tempu udan boot, maibe seidauk iha ponte atu fasilita movimentasaun.
Nia katak, mota Mulia tinan naruk impede movimentasaun, maibe Autoridade Munisipal labele solusiona, tanba atu konstrui ponte iha mota refere ho kapasidade orsamentu montante boot, nunee Autoridade Munisipiu Baukau submete ona proposta ba Governu Sentral atu konstrui ponte kiik no boot hamutuk 30 iha fatin identifikadu sira neebe inklui mos mota Mulia.
“Ponte lubuk ida hanesan Seisal Mulia kiik no boot hamutuk 30 hanesan nee iha Baukau laran tomak, maine imposivel Governu atu haree hotu 30 nee maibe sei haree prioridade sira,” Veneranda komenta.
Husi proposta ba ponte kiik no boot hamutuk 30 nee, Veneranda katak, imposivel Governu Sentral atu konstrui dala ida iha tinan ida, maibe sei responde uluk kategoria emerjensia sira hanesan mota Mulia neebe tinan naruk laiha ponte hodi impede komunidade sira nia movimentu iha tempu udan.
Iha fatin hanesan, Administrador Postu Administrativu Laga, João de Castro Freitas aprezenta iha reuniaun Konselhu Kordenasaun Munisipal Baukau, iha loron 22 Fevereiru 2026 mota Mulia impede movimentasaun transporte publiku no privadu, tanba korente mota boot neebe kauza husi udan no anin too rezulta bebe ida hakotu iis.
Nunee husu Autoridade Munisipal atu kontinua halo koordenasaun ho Governu sentral konstrui ponte iha mota refere hodi fasilita movimentasaun sira.
(tom)
