DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, deside aplika pena supensaun ba iha arguida HSJ hanesan sidadaun Xineza.
Iha leitura akordaun nee, Tribunal deside katak arguida nia hahalok nee prienxe duni ba iha elementu krime subjetivu no objetivu.
Tribunal deklara, krime rua neebe akuza ba arguida krime Falsifikasaun Simples no krime Falsifikasaun Agravadu. Tanba nee ba iha krime Falsifikasaun Simples Tribunal kondena arguida ho pena prizaun tinan ida. Ba krime Furtu Agravadu Tribunal kondena arguida ho pena prizaun tinan 3.
Ikus mai kolektivu deside hodi halo Komula Juridiku ba iha pena uniku, ho nunee Koletivu deside kondena arguida ho pena prizaun tinan 3, suspende ba tinan 4.
Tribunal deklara, kona-ba sasan sira neebe uza hodi pratika krime, Tribunal Koletivu ordena hodi halo destruisaun.
Iha desizaun nee mos Tribunal esplika ba iha arguida atu la aseita ho desizaun Tribunal nian, liu husi defeza arguida nian halo rekursu ba iha Tribunal Rekursu (TR) durante prazu loron 30 nia laran.
Antes nee iha faze alegasaun Prokurador Aderito Tilman husu Tribunal tetu atu aplika pena ba arguida, tuir modura husi krime nee.
Enkuantu husi parte defeza Juvinal Dias husu Tribunal tetu atu aplika pena suspensaun ba iha arguida.
Iha faktus sufisiente katak, arguida HSJ nudar nain ba empreja YI PIN JIA 08 AGENCIA UNIP. LDA. ho nia diresaun iha Hudi Laran aldeia Teki-Teki, suku Bairo Pite, Postu Administrativu Dom Aleixo, Munisipiu Dili.
Haktuir dokumentu aprezentadu, empreza YI PIN JIA 08 AGENCIA UNIP. LDA harii iha loron 10 fulan Maiu tinan 2019, ho nia objetivu atu trata dokumentu ka vistu ba trabalhador sidadaun Cinez sira neebe mak tama mai servisu iha Timor Leste.
Halo analiza mos ba dokumentu sertifikadu rejistu kriminal hatudu katak, arguda falsifika ho maneira altera loron emisaun hodi indika loron, fulan no tinan ho maneira koa sai tiha letra sira antes nee hakerek ona hanesan loron 13 fulan Junu tinan 2022 hodi subtitui fali ho data seluk husi orijinalidade iha dokumentu refere.
Identifika mos katak, arguida mos falsifika dokumentu sira husi loja kompañea Maubisse Unip.Lda. no karimbu Inspeksaun jeral Trabalhu nian (IIT), autorizasaun vistu trabalho hodi altera identifikasaun LY ba fali CW hodi justifika ba Diresaun Assuntu Konselu Ministerio Negosio Estranieiru no Kóperasaun hanesan pareser favoravel ba vistu fixasaun rezidensia nian.
Aleinde ida nee, deteta mos katak liu husi, arguida nia kompanea YI PIN JIA 08 AGENCIA UNIP. LDA, arguida konsege produz falsifika karimbu ho total hamutuk 107.
Tuir faktu neebe indika iha autus konfirma katak, arguida sempre falsifika dokumentu sira deskrita iha leten ho propriu arguida nia ekipamentu ho forma repetidu.
Arguida aproveita situasaun nee hodi inventa, produz no emite dokumentu Estadu nian hodi bosok no fasilita sidadaun cineza sira hodi hetan vistu trabalho no vistu fixasaun rezedensia ba sidadun cineza sira nee, hodi halao atividade negosio no permanense iha Timor Leste. Arguidu hatene katak ho enganu ou bosok nee, halo Estadu sofre prejuizu neebe signifikativu tebes.
Audensia julgamentu nee, prezide husi Juiz Kolektivu Jose Escurial, Fransisca Cabral, Juiz Estajiadu nain ida, Ministeriu Publiku reprezenta husi Prokurador Aderito Tilman, arguida sira hetan asistensia legal husi Defensor Publiku Juvinal Dias.
(ter)
