DILI, STLTIMORLESTE.com – Polisia Sientifika Investigasaun Kriminal (PSIK) halo identifikasaun ba suspeitu Timoroan ida inisial JM neebe uza modus oin-oin, mak uza aplikasaun TIK-TOK hodi lohi ka bosok vitima sira ba servisu iha Australia.
“Ami informa ba komunidade no sosiedade sira katak, servisu informasaun polisia PSIK nian iha terenu halo atividade vizilansia hodi tuir suspeitu ida neebe alegadamente halo atividade burla hodi lohi vitima sira atu haruka vitima sira ba servisu iha Australia. Prezuiju neebe vitima sira hetan montante osan besik US$ 11 mil. Suspeitu nee ita halo ona identifikasaun”, hateke Xefe Investigador PSIK, Maria Francisco de A Tavares ba jornalista sira iha edifisiu PSIK, Kaikoli, tersa (24/02/2026).
Nia dehan, suspeitu refere komesa ninia modus operariu liu husi aplikasaun iha TIK-TOK neebe mak konvense vitima sira atu bele intrega osan balu ba nia atu nia kaer tiha dokumentu balu atu vitima sira hodi ba servisu iha Australia.
“Suspeitu nee halo nia modus operariu hodi atrai vitima sira, ba dahuluk nia konfesa nian aan ba vitima sira hanesan mediku ida iha Hospital Nasional Guido Valadares no ekipa PSIK halo duni konfirmasaun ho mediku ida neebe nia temi nia naran, sim mediku refere iha duni, maibe laos mediku nee mak halo,” nia esplika.
Nia haktuir katak, suspeitu refere mos konvense vitima sira hodi hatete katak, nia hanesan membru Polisia Militar (PM) neebe mak halo rekrutamentu.
“Purtantu ita halo konfirmasaun nia laos membru husi instituisaun F-FDTL nian. Ikus liu ida neebe boot liu nia halo konvense ba vitima sira, nia hatete nia hanesan oan husi membru Governu ida neebe mak nia halo servisu husi ninia membru Governu, tanba nia hetan konfiansa husi nai ulun politiku sira, no nia garante katak nia bele haruka ema ba servisu iha Australia”, nia informa.
Nia hatutan, suspeitu nee mos promete ba iha vitima sira katak, atu vitima sira aranka ba Australia iha semana kotuk dia 15 Fevereiru, no nia muda fali ba dia 19 Fevereiru no la konsege no nia hatete tan ba vitima sira katak, aban aranka ba Austalia.
“Depois ita halo inmdentifikasaun naruk, dezde horikalan, ita halo identifikasaun suspeitu refere utiliza kareta neebe mak nia aluga, nia la uza rasik, nia modus ida mak uza kareta aluga hodi dezvia tiha nia identifikasaun no husi vizilansia neebe ekipa servisu informasaun halo konsege too duni kareta nain. Husi kareta nain mak ita konsege hatene suspeitu nee mak se no suspeitu inisial JM,” nia deklara.
Nia informa, kaptura suspeitu refere iha area Bairo Pite hodi halo identifikasaun durante oras 12 nia laran. PSIK foti suspeitu bazeia ba keixa husi vitima sira.
Tanba nee, depois keixa PSIK halo tratamentu rekolha informasaun sira ninia konversa ho vitima sira, tanba nee ita foti nia bazeia ba provas sira neebe mak rekolha tiha ona.
“Evidensia iha mak nee, ita idenfika kareta neebe mak nia utiliza nomos identifika tuir vitima aprezenta provas neebe mak iha. Prova prinsipal neebe mak iha mak vitima keixa hasoru nia”, nia dehan.
“Vitima iha nain rua, maibe atividade hanesan nee ita hatene katak, vitima barak los tiha ona, nain rua mak hatoo uluk keixa ho prezuiju osan US$ 11 mil. Ami investigador iha konfiansa katak, nia mos la servisu mesak, iha ninia rede sira neebe mak servisu hamutuk ho nia. Klaru ita sei buka tuir rede sira nee,” nia haktuir.
Nia mos afirma, daudaun nee autoridade PSIK seidauk identifika suspeitu nee ninia pozisaun servisu lo-loos, maibe tuir informasaun nia laos funsinariu.
(jen)
