DILI, STLTIMORLESTE.com – Membru Parlamentu Nasional (PN) husu IX Governu Konstitusional neebe lidera husi Primeiru Ministru (PM) Kay Rala Xanana Gusmão atu reabilita estrada diresaun husi Vikeke Vila too Postu Administrativu Uatokarbau.
Deputada Bankada Partidu KHUNTO, Olinda Guterres hateten, governu presiza reabilita lalais estrada husi Vikeke Vila too Postu Uatokarbau, tanba dezde Timor Leste ukun aan iha tinan 2002 liu ba mai too agora seidauk hetan atensaun husi governu.
“Neebe hau husu ba governu, estrada Urbana Baukau lansa ona, se bele karik lansa mos fatuk dahuluk ba estrada husi Vikeke Vila too iha Postu Uatokarbau neeba,” rekomenda deputada Olinda liu husi plenaria PN, Tersa (24/02/2026).
Deputadu Olinda afirma, estrada Vikeke nia laos foin mak levanta iha plenaria, maibe dezde mandatu VIII Governu maibe too agora governu seidauk bele responde.
Nia dehan, se governu reabilita estrada nee ba oin sei konstribui tebes ba ekonomia povu nia, tanba populasaun sira iha produtus agrikula barak atu lori mai faan iha merkadu liu-liu iha Munisipiu Dili.
“Tanba iha neeba populasaun sira neebe iha natar no aifuan barak atu lori ba faan iha merkadu maibe la diak, tanba kondisaun estrada iha neeba labele apoiu oinsa mobiliza produtu sira nee ba faan iha merkadu,” tenik nia.
Reprezentante povu nee kompromente ba oin sei kontinua levanta beibeik preokupasaun populasaun nia kona-ba kondisaun estrada Munisipiu Vikeke, wainhira governu liu husi MOP seidauk iha planu atu reabilita estrada iha munisipiu nee.
Hatan ba preokupasaun nee Vise Ministru Asuntu Parlamentares (VMAP), Aderito Hugo afirma, reabilitasaun estrada iha Munisipiu Vila too Uatokarbau sai planu prioridade Governu nian hafoin lansa estrada Urbana Munisipiu Baukau.
“Governu tau ona planu atu lansa fatuk dahuluk ba Konstrusaun estrada iha Postu Uatokabau hafoin lansa estrada urbana Munisipiu Buakau nian,” hatan Aderito Hugo.
Nia dehan, la kleur tan MOP sei anunsia prosesu tenderizasaun ba prosesu konstrusaun Eastrada Iliomar, Uatukarbau no Uatolari, Vikeke Vila, Natarbora, Fauteberliu Alas Betanu too Hatuudu, tanba prosesu aprovizionamentu oras nee lao hela.
(alb)
