BAUKAU, STLTIMORLESTE.com – Autoridade lokal Suku Samalari, Postu Administrativu Baukau Vila, Munisipiu Baukau, husu parte kompetente sira hanesan Servisu Florestal Delegasaun Territorial atu asegura ezistensia Lafaek nian iha mota samalari ba fatin propriu hodi la prejudika komunidade sira nia movimentasaun.
Xefe Suku Samalari, Rui Sertório Magno Siquera informa, dauduan nee mota samalari prejudika komunidade sira nia movimentu ba toos no natar, tanba daudaun nee nakonu ho Lafaek. Ezistensia Lafaek nian iha mota refere laos fo deit impaktu ba komunidade agrikultores sira nia movimentu, maibe hamate ona sidadaun mane ida iha mota refere.
Sidadaun nee Lafaek hamate liu husi tata bainhira sidadaun refere kail hela boek, tuna no seluk tan iha mota refere. Ho insidente nee, Rui Sertório katak, hanesan Autoridade Lokal aprezenta ona ba Autoridade kompetente sira atu halao asaun ruma ba ezistensia Lafaek iha mota refere hodi nunee labele prejudika komunidade agrikultores sira nia movimentu no afeta ba insidente neebe la espera.
“Hanesan Autoridade sempre aprezenta informasaun nunee bele foti desizaun bele halo atuasaun ba hahalok Lafaek nian iha mota, tanba daudauk nee Lafaek komesa aumenta ninia volume barak tan deit halo tauk povu agrikultora, bainhira sira lao atravesa mota tenke tau sira nia sinais ba iha mota,” Rui Sertório Magno Siquera hateten ba STL iha Vila Nova Baukau, Kuarta (25/02/2026).
Nia sublina, Lafaek nia ezistensia iha mota Samalari laos fo impaktu deit ba komunidade agrikultores sira iha Suku Samalari nia movimentu lao ain iha mota refere, maibe fo mos impaktu ba komunidade agrikultores sira husi Suku Builai, Buibai, Buruma no Seisal, tanba mota salamari abranje too Suku Seisal neebe fo impaktu mos ba komunidade sira husi suku 4 refere, tanba halo toos no natar iha mota ninin.
Nia aprezenta, ezistensia Lafaek iha mota Samalari daudaun iha 4 no hahu tolun ona, kada Lafaek ida iha tolun besik 90, maibe bainhira Autoridade kompetente la halo atuasaun ba asuntu nee sei fo impaktu ba komunidade sira hela iha mota ninin.
Nunee husu Autoridade kompetente atu foti medida urujente no obrigatoriu muda Lafaek husi mota samalari ba fatin propriu.
“Prezisa tau ordem para ita nia komunidade moris diak entuan Autoridade hotu-hotu nia kapasidade tau hamutuk para ita hasai Lafaek iha mota laran ba tau iha fatin ida, nunee ita livre ema seluk husi rai seluk hakarak vizita labele tauk hahalok Lafaek nian,” nia komenta.
Enkuantu too notisia nee publika STL seidauk hetan konfirmasaun husi Autoridade kompetente hanesan Servisu Florestal Delegasaun Territorial neebe destaka iha Munisipiu Baukau.
(tom)
