DILI, STLTIMORLESTE.com – Tribunal Judisial Primeira Instansia Dili (TJPID) kontinua halao julgamentu ba kazu Metiaut, neebe komete husi arguidu nain tolu ho inisial FCB, OCAdCG no LRCG hasoru lezadu inisial T.
Iha indisus sufisiente katak, iha loron 19 fulan Novembru tinan 2024, iha oras maizumenus 01h00 madrugada, iha Metiaut, Dili, momentu neeba arguidu sira mak hanesan FCB, OCAdCG, LRCG, hamutuk ho kolega sira seluk hemu hamutuk tua iha area Kristu Rei nian.
No bainhira arguidu sira hemu hela tua, lezadu mos hemu tua hamutuk ho arguidu sira. Hafoin lanu ona, lezadu komesa tolok ona arguidu sira, hafoin lezadu mos fila tiha ba uma.
Bainhira lezadu fila tiha ba uma, nunee arguidu sira mos ho kondisaun lanu todan fila mos ba uma neebe mak lokaliza iha Metiaut.
Bainhira arguidu sira too iha Metiaut, lezadu ho nia grupu mos fila fali mai iha Metiaut hodi tuda malu ho arguidu sira.
Bainhira iha tuda malu arguidu LRCG uza fatuk ida hodi tuda kona kedas iha lezadu nia ibun, nunee kauza kanek no halo mos lezadu monu kedas ba rai.
Bainhira lezadu monu ona iha rai, arguidu OCAdCG uza liman hodi tuku kona kedas lezadu nia ulun kauza moras, hafoin arguidu FCB ho kondisaun lanu todan foti katana ida hodi taa kedas iha lezadu nia ulun nomos taa tan dala ida iha kotuk laran, kauza lezadu hetan kanek no raan sai barak, hafoin lezadu mos monu kedas ba rai.
Motivu husi problema nee tanba entre lezadu ho arguidu sira asalta malu tanba arte marsiais.
Konsekuensia husi arguidu sira nia hahalok nee mak halo lezadu hetan kanek iha ibun, kanek iha ulun no kotuk laran, tanba hetan asalta husi arguidu sira ho fatuk, liman no katana, nunee halo lezadu hetan tratamentu iha HNGV.
Arguidu sira halo ho forma livre, deliberada no konsiente, hatene hela katak lori fatuk hodi tuda, uza liman hodi tuku no uza katana hodi taa, bele halo kanek no bele hamate ema seluk nia vida, arguidu sira tau hamutuk sira nia forsa no kaer katana hodi taa arguidu sira iha pose ba armas e tuir lei Penal bandu, maibe arguidu sira halo nafatin sira nia hahalok nee, hanesan meius ou instrumentu ida neebe mak aptu no adekuadu.
Arguidu sira mos hatene hela katak, sira nia konduta nee tuir lei penal bandu.
Tanba nee, arguidu nain tolu hanesan ko-autoria material ba pratika krime omisidiu simples previstu tuir artigu 138 Kodigu Penal, ho forma tentada tuir artigu 23 Kodigu Penal, no arguidu FCB hanesan mos autoria ba pratika krime Arma Branka, haktuir ba artigu 20 husi Lei no 5/2017, loron 19 fulan Abril, iha konkursu ba krime, tuir artigu 35 husi Kodigu Penal.
Iha sala julgamentu laran lezadu deklara katak, momentu neeba lezadu la hemu tua ho arguidu sira, nein halo provokasaun ba arguidu sira, maibe arguidu sira mak ho kondisaun lanu halo agresaun ba lezadu.
Lezadu deklara katak, momentu neeba lezadu hetan taa dala ida no hetan agresaun lori ba hospital, lezadu sente nehan nakdoko hotu, baixa durante semana ida, suku iha inus, ibun, liman, parte kotuk, rentos.
Aleinde nee arguidu FCB deklara katak, momentu neeba hetan provokasaun husi lezadu ho nia kolega sira, hodi ikus mai mosu tiha problema.
Arguidu rekonhese lori duni katana taa dala ida ba iha lezadu, maibe haree lezadu monu tiha ba rai, arguidu mos halai ses kedan husi fatin akontesimentu.
Arguidu esplika tan, sira hamutuk nain sanulu resin tolu (13) mak momentu neeba hemu tua hamutuk.
Enkuantu arguidu nain rua OCAdCG no LRCG deklara, momentu neeba sira hetan provokasaun uluk husi lezadu ho nia kolega sira, tanba nee mak mosu problema.
Rona tiha deklarasaun sira nee, Tribunal adia ba loron seluk hodi rona alegasaun.
Prosesu nee prezide husi Juiz Koletivu, Jose Quintao, Jose Gonsalves, Jumiati Freitas, Ministeriu Publiku reprezenta husi Prokurador Hernani Rangel, arguidu hetan asistensia legal husi Advogadu Privadu nain ida.
(ter)
