DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial FC hanesan aman, neebe halo agresaun ba nia oan feto rasik inisial M.
Iha indisus sufisiente katak, iha loron 19 fulan Maiu tinan 2025, haleu oras tuku 19:00 iha Dili, arguidu FC lori ai ida hodi baku kona iha ofendida M hanesan oan feto nia kotuk laran, baku too ai tohar, no arguidu lori liman rakut ofendida nia fuk lori liman basa kona iha ofendida nia oin dala barak, no arguidu rakut tan ofendida nia fuuk hodi basa tan dala ida kona iha ofendida nia hasan.
Konsekuensia direta husi arguidu nia hahalok nee ofendida hetan isin bubu no metan, moras iha kelen bubu no metan, moras iha liman bubu no metan, moras iha matan laran, bubu iha tilun.
Ofendida ba halo tratamentu iha PRADET, ezaminasaun Mediku, Forensik. Kauza husi problema nee tanba arguidu bandu ofendida sira ho nia alin labele hasoru nia inan, maibe ofendida ba hasoru.
Arguidu FC halo ho forma livre, deliberada no konsientemente hatene katak, lori ai ida hodi baku kona iha ofendida nia kelen ho kotuk laran, baku too ai tohar, no arguidu lori liman rakut ofendida nia fuk no lori liman basa kona iha ofendida nia oin dala barak, no arguidu rakut tan ofendida nia fuk hodi basa tan dala ida kona iha ofendida nia hasan, nuudar meiu ida neebe hodi hamoras ofendida nia isin lolon no saude.
Arguidu mos hatene hela katak, nia hahalok sira nee proibidu tuir lei penal, tanba nee konstitui arguidu hanesan autor material ba pratika krime ofensas ba integridade fisika simples, tuir artigu 145 ho Referensia ba Lei no 7/2010, haktuir ba artigu 2,3, no 35, ba Krime Violensia Domestika.
Hatan ba faktus neebe iha arguidu deklara katak, kona-ba faktus neebe iha loos hotu, maibe kona-ba ida neebe dudu nee lalos ida.
Arguidu deklara, lezada hanesan arguidu nia ona ba dala tolu, momentu neeba nia halo ona tinan sanulu resin lima (15). Arguidu deklara baku lezada tanba ba eskola la fila mai uma, maibe ba hasoru fali nia inan no fila uma iha kalan boot. Tanba nee mak halo arguidu nervozu hodi baku lezada.
Arguidu deklara, depois akontese problema lezada la eskola ona iha Likisa, maibe muda ba eskola iha Baukau hodi hela hamutuk ho lezada nia inan.
Arguidu deklara tan, sira iha oan nain haat, maibe arguidu ho lezada fahe malu ona, lezada hola ona mane kiik, tanba nee lezada hamutuk ho nia oan nain rua hela iha Baukau, arguidu ho nia oan nain rua hela iha Dili.
Arguidu esplika tan, depois akontese problema lezada ba tiha Baukau, maibe arguidu tuir ba hodi husu deskulpa no kontinua fo osan ba lezada ho nia alin neebe hela ho nia inan iha Baukau, maske sira fahe malu ona.
Arguidu rekonhese, ho lezada nia relasaun hanesan aman no oan, agora lao diak ona la iha tan problema ona.
Tribunal haree katak arguidu konfesa ba faktus, tanba nee Tribunal husu atu tama ba iha alegasaun.
Iha alegasaun nee Prokuradora Estajiada deklara katak, arguidu nia aktu prienxe duni ba krime neebe iha, tanba nee husu Tribunal atu aplika pena multa ba arguidu.
Enkuantu husi parte defeza nian Humberto Alves deklara katak, arguidu arepende ona ba nia hahalok, tanba nee husu Tribunal atu aplika pena justu ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Escurial, Ministeriu Publiku reprezenta husi Prokuradora estajida, arguidu hetan asistensia legal husi Defensor Publiku Humberto Alves.
(ter)
